भोरमदेव साहित्य सृजन मंच कबीरधाम के वार्षिक अधिवेशन म जुरियाइन प्रदेशभर के साहित्यकार - कलाकार

भोरमदेव साहित्य सृजन मंच कबीरधाम

अंजोर.ए। भोरमदेव साहित्य सृजन मंच के दुसरइया वार्षिक अधिवेशन-2022 के आयोजन 31 मई के लोहारा के मंगल भवन म आयोजित करे गे रिहिस। जेमा माई पहुना रहिन पद्मश्री डॉ. ममता चंद्राकर, कुलपति इंदिरा कला संगीत विश्वविद्यालय खैरागढ़, पगरइती करिन लखन लाल भौर्या निदेशक आकाशवाणी रायपुर, खास पहुना मन रहिन डॉ. अनिल कुमार भतपहरी, भावना वोहरा, श्रीमती लीला धनुक वर्मा, श्रीमती उषा मनहरण श्रीवास। ये मउका म प्रदेश भर के साहित्यकार अउ कलाकार मन तको सौ-सौ ले आगर संघरे रहिन।

कार्यक्रम के शुरूआत सरसती दाई के पूजा अर्चना होइस, संग म छत्तीसगढ़ महतारी के वंदना ‘अरपा पैरी के धार’ राजगीत होइस। पहुना मन के अभिनंदन, स्वागत-सत्कार अध्यक्ष मिनेश साहू, संरक्षक ज्ञानुदास मानिकपुरी जी के संग भोरमदेव साहित्य सिरजन मंच के सबो सदस्य मन मिलके करिन।

कार्यक्रम के पहिली सत्र म साहित्य के क्षेत्र म बड़का अउ जबर बुता करइया मनके सम्मान होइस जेमा परमुख रूप ले छत्तीसगढ़ मा महतारी भाखा के समृद्धि बर समर्पण खातिर प्रतिबद्ध अउ संकल्पित व्यक्तित्व ‘छंद के छ’ आनलाइन गुरुकुल के संस्थापक अरुण कुमार निगम जी दुर्ग ला ‘भोरमदेव साहित्य रतन’ सम्मान ले सम्मानित करे गिस। ‘भोरमदेव कला रतन सम्मान’ श्रीमती जयंती यादव लोक गायिका, ‘नवा अंजोर सम्मान’ प्रमोद साहू अंतर्राष्ट्रीय रंगोली कलाकार, ‘मोर संग चलव सम्मान’ वक्ता मंच रायपुर अउ स्वास्थ्य विभाग कबीरधाम, ‘डेरौठी के दीया-सुरता सम्मान’ स्व. पाठक परदेशी राम वर्मा, अउ स्व. महेंद्र देवांगन माटी जी मनला प्रदान करे गिस।

‘लोकधुन काव्य धारा सम्मान’ ले सम्मानित होइन-  गौतमचंद्र जैन, प्रभु सिन्हा, श्रीमती भगवती साहू, महादेव हिरवानी, चंद्रभूषण वर्मा, नंदकुमार साहू, डेविड निराला, राकेश सेन, सूरज श्रीवास, पंडवानी गायक गुलशन प्रहलाद निषाद, आरु साहू, सुश्री लक्ष्मी करियारे, हेमराज सिन्हा, स्वेच्छा साहू, डिमान सेन, साहित्यकार जीतेंद्र वर्मा खैरझिटिया, मनीराम साहू मितान, ईश्वर साहू बंधी, उमाकांत टैगोर, दिनेश देहाती, बिरेन्द्र चंद्रसेन, हिमांशु हरिहरानो, दिरगा राम यादव कवयित्री संतोषी महंत श्रद्धा आदि मनके सम्मान होइस।

ये मउका म भोरम देव साहित्य सिरजन मंच के अध्यक्ष मिनेश साहू ‘मेघ’ के बाल साहित्य पुस्तक ‘सगा-पुतानी’ के विमोचन पहुना मन के करकमल ले होइस। सगा-पूतानी बाल साहित्य के भूमिका वाचन वरिष्ठ छंदकार सुखदेव सिंह अहिलेश्वर करिन, बाल मनोरंजन बर लिखे गीत, कविता के प्रस्तुतिकरण ले बालपन के सुकोमल भाव ला रेखांकित करे गे हवँय।

‘भोरमदेव साहित्य रतन’ सम्मान ले सम्मानित अरुण निगम जी अपन अनुभव उद्बोधन म कहिन के छत्तीसगढ़ी भाखा महतारी के सेवा करइया छंद साधक मन के संख्या दू सौ ले आगर होगे हाबे। ए सम्मान उँकर लगन, मेहनत अउ सतत् सेवा साधना के परिणाम आय, ‘छंद के छ’ छत्तीसगढ़ी भाखा के कोठी ला सिघियाय बर एक जन आंदोलन के रुप ले लेहे।

‘नवा अंजोर सम्मान’ ले सम्मानित रंगोली कलकार प्रमोद साहू जी अपन अनुभव कथन म कहिन के बड़े मंच म जाये बर सीढ़ी दर सीढ़ी चढ़े ला परथे, कला हर बहुत धैर्य के साधना आय। ‘कला रतन सम्मान’ ले सम्मानित लोक गायिका श्रीमती जयंती यादव जी मन अभी के चलत निर्थक गीत मन उपर चिंता जाहिर करत कहिन के अब के गाना मन ले मन नइ भरय, अपन माटी-अस्मिता ले वो लगाव नइ बन पावय। अपन कोकिलकंठ ले सुमधुर गीत ला प्रस्तुत करिन अउ गीत मन कोन परिस्थिति ले बनथे वो समे के गीतकार डॉ. नरेंद्र देव वर्मा, दाऊ राम चंद्र देशमुख, मुरली चंद्राकर जी मन के सुरता करिन।

माई पहुना पद्मश्री डॉ. ममता चंद्राकर जी कहिन के आज बहुत दिन बाद कोनो बड़े कार्यक्रम म अतेक कलाकार मनके सम्मान होवत हाबे ए आगू बढ़े के प्रेरणा देथे, नवोदित कलाकार मनला उत्साहित करथे। ए सुग्घर उदिम आय जेन मा वरिष्ठ कला साधक मनके संग नेवरिया मन ला तको सम्मान अउ सराहना मिलत हाबे। आगू कार्यक्रम म छत्तीसगढ़ राज भाषा आयोग के सचिव डॉ. अनिल भतपहरी, सीता राम साहू श्याम, चतुर राम साहू, रामेश्वर शर्मा, बृजकिशोर पाण्डेय अम्बर, महेश आमदे मन तको अपन विचार रखिन।

भोरमदेव साहित्य सृजन मंच कबीरधाम के वार्षिक अधिवेशन के दूसर सत्र म कवितापाठ के आयोजन करे गे रिहिस जेमा सूरज श्रीवास, लक्ष्मी  करियारे, डॉ. अशोक अकाश के वंदना ले शुरू होगे सरलग संझाबेरा मुँधियार के होवत ले चलिस। काव्यपाठ म चोवाराम बादल वर्मा, घनश्याम सोनी, ईश्वर साहू, हरिश पटेल, लखनलाल साहू, सुखदेव सिंह अहिलेश्वर, मोहन लाल वर्मा, सचिन निषाद, सुनील शर्मा नील, दयालू भारती, ओमप्रकाश साहू अंकुर, देव जोशी गुलाब, शशांक यादव गंडई, ईश्वर निषाद, विकास कश्यप, भागवत साहू, कु सपना गुप्ता, हेमलाल साहू, मोहन कबीरपंथी, बोधन निषाद विनायक आदि कवि मन भाग लिस।