लइका ल स्कूल ले जोड़े अउ पढ़े-पढ़ाये के बढि़या माहौल बनाये खातिर स्कूल म सुरू होही पालक जागरूकता अभियान

रायपुर। छत्तीसगढ़ सरकार डहर ले राज्य म प्राथमिक शिक्षा के स्तर म सुधार के खातिर नवाचार अउ विविधि गतिविधी ल बढ़ावा देके पहल सरलग करत हावय। इही कड़ी म पालक जागरूकता अभियान सबो स्कूल म सुरू करे जात हावय। येकर उद्देश्य पालक के सक्रिय भागीदारी सुनिश्चित करके पठन-पाठन के स्तर ल बढि़या बनाना हावय। सचिव स्कूल शिक्षा विभाग डॉ. एस. भारतीदासन ह सबो जिला शिक्षा  अधिकारी मनला स्कूल म पालक जागरूकता अभियान के पालन सुनिश्चित करे अउ ए अभियान के तहत संचालित गतिविधी के सरलग रूप ले मॉनिटरिंग करके येकर रिपोर्ट शासन के भेजवाये के निर्देश दे हावयं।

ए अभियान के तहत सबो स्कूल म स्कूल प्रबंधन समिति अउ पालक के सम्मेलन आयोजित करे जाही। पालक ल लइका के शिक्षा म बिसेस धियान दे, सरलग स्कूल आये, लइका के पढ़ाई-लिखाई के संबंध म गोठबात करे खातिर प्रेरित अउ प्रोत्साहित करे जाही। ए अभियान के तहत लइका के पढ़ाई म धियान दे के नवा तरीका प्रयोग म लाने के बारे म तको राय-मशविरा अउ सक्रिय पालक के मदद ले आन पालक ल तको स्कूल अउ लइका के शिक्षा ले जोड़े सक्रिय जिम्मेदारे दे जाही।

जिला शिक्षा  अधिकारी मन ए अभियान के संबंध म जारी पाती म किहिन के पालक जागरूकता अभियान के क्रियान्वयन के खातिर कोर ग्रुप के गठन करे जाही।  येकर खातिर सबोच जिला अउ विकासखण्ड ले 5-5 विभागीय अधिकारी के चयन करके कोर ग्रुप म सामिल करे जाही। जिला स्तर ले सहायक परियोजना अधिकारी (एपीसी), डाईट अकादमिक सदस्य, एसएमसी मास्टर ट्रेनर अउ विकासखण्ड स्तर ले सहायक विकासखण्ड शिक्षा अधिकारी कोर गु्रप म होही। इही रकम ले संकुल स्तर म सबोच स्कूल ले एक सक्रिय स्कूल प्रबंध समिति के सदस्य, एक शिक्षक, एक सक्रिय माता, चयनित जनप्रतिनिधि अउ एक प्रभावी मनखे जेकर बात सबो मानते होही ओला कोर ग्रुप म सामिल करे जाही।

ये कोर ग्रुप पालक जागरूकता अभियान जिला के सबो स्कूल म पालक जागरूकता कार्यक्रम के खातिर कार्ययोजना तइयार करही। येकर अलावा सबोच स्कूल म पालक जागरूकता के खातिर रणनीति अउ गोठबात के बिन्दू, गतिविधि तको तइयार करही। विकासखण्ड अउ संकुल स्तर म कोर ग्रुप के उन्मुखीकरण अउ स्थानीय इनपुट देही। स्कूल स्तर म स्कूल प्रबंधन समिति अउ पालक के उन्मुखीकरण कार्यक्रम के कार्य करही। पालक उन्मुखीकरण के बाद निरंतर फालोअप अउ पालक मनके सक्रिय सहभागिता के बढि़या उदाहरण के संकलन, दस्तावेजीकरण करके प्रचार-प्रसार करही।