चौथीं कक्षा के लइका सुनाइस 22 के पहाड़ा, कलेक्टर गदगद होके शिक्षिका ल दीस शाबासी... पढ़व छत्तीसगढ़ी म अब पूरा समाचार

कांकेर। जिला के कलेक्टर डॉ. प्रियंका शुक्ला ह जिला पंचायत के मुख्य कार्यपालन अधिकारी सुमीत अग्रवाल के संग चारामा विकासखण्ड के प्राथमिक अउ माध्यमिक स्कूल सराधुनवागांव, हायर सेकेण्डरी स्कूल हाराडुला अउ जेपरा, छात्रावास, आंगनबाड़ी अउ वेलनेस सेंटर जेपरा अउ मुख्यमंत्री हाट-बाजार क्लीनिक पलेवा के आकस्मिक निरीक्षण करके शिक्षा, स्वास्थ्य अउ छात्रावास म जरूरी सुविधा अउ हाट-बाजार म मरीज मन के उपचार के जायजा लिस। ओमन पढ़ईया मनला कक्षा म पढ़ाके उंकर हौसला अफजाई करिस अउ जीवन म सफल इंसान बने के खातिर अच्छा ले पढ़ाई करे के खातिर समझाईस दीस।

ये मउका म ग्राम सराधुनवागांव के प्राथमिक स्कूल म आकस्मिक निरीक्षण के बखत कक्षा चौथी के नोनी कुमारी खिमेश सिन्हा ह 22 के पहाड़ा अउ डकेन्द्र कुमार साहू ह 21 के पहाड़ा पढ़के कलेक्टर डॉ. प्रियंका शुक्ला ल सुनाइस, जेकर ले वो बहुत खुश होइसं अउ स्कूल के शिक्षिका श्रीमती ग्वालिन जुर्री ल शाबासी दीस। ए स्कूल के सबो कक्षा म कलेक्टर ह पढ़ईया मन ला पढ़ाइस अउ ओला अंग्रेजी, हिन्दी विषय ल पढ़के बताये के खातिर तको कहिन।

कलेक्टर डॉ. प्रियंका शुक्ला ह जेपरा के छात्रावास अउ वेलनेस सेंटर अउ आंगनबाड़ी केन्द्र के तको निरीक्षण करिन। छात्रावास के खिड़की म मच्छर ले बचाये के खातिर जाली लगाये के निर्देस तको दिये। वेलनेस सेंटर के स्वास्थ्यकर्मी ले गांव के प्रसूता महिला मन अउ संस्थागत जचकी के जानकारी लिस अउ मलेरिया के संबंध म पूछताछ करे गिस अउ गांव के 30 साल ले जादा उमर के सबो लोगन के बी.पी. अउ शुगर जांच करे के निर्देस दिस। गांव के सबो लोगन ल मच्छरदानी के उपयोग करे के खातिर समझाईस दे बर गांव पंचायत के सरपंच भागवत नेताम के निर्देसित करिन।