Mahasamund Police : महासमुंद एसपी भोजराम पटेल के नवाचारी उदीम : ड्यूटी सुरू करे के पहिली ‘अरपा पैरी के धार’ राज्यगीत के गायन... छत्तीसगढ़ी म पढ़व पूरा समाचार

महासमुंद। महासमुंद के पुलिस अधीक्षक कार्यालय अउ  सबो थाना अउ रिजर्व पुलिस लाईन म अलग ही नजारा देखे गिस। पुलिस लाईन अउ थाना म मौजूद जवान मन ह  जब छत्तीसगढ़ के राज्यगीत 'अरपा पैरी के धार ...' के गायन करिन त सबो लोगन मंत्रमुग्ध होगिस। महासमुंद के नवपदस्थ एसपी भोजराम पटेल ह रोज लाईन अउ सबो थाना म बिहनिया गणना के समय राज्यगीत  गायन के निर्देश जारी करे  हावयं। ए अनूठी पहल के शुरुआत म पुलिस जवान मन ह अपन ड्यूटी जगह म एक संग राज्य गीत गाही। जानबा होवय के राज्य सरकार के निर्देश म सबो सरकारी कार्यक्रम के शुरूआत छत्तीसगढ़ के राज्यगीत ले ही होवत हावय। अब महासमुंद एसपी ह रोज ड्यूटी गणना के समय राज्यगीत गायन के निर्देश जारी करे  हावयं।

आयोजन के पहिली दिन एसपी कार्यालय समेत रिजर्व पुलिस लाईन, 12 थाना, 05 चौकी, के जवान मन ह अपन-अपन कार्यस्थल म राज्यगीत 'अरपा पैरी के धार..' के गायन म सामिल होइस।  ए मउका म एसपी भोजराम पटेल ह किहिन के छत्तीसगढ़ राज्य हमर महतारी के समान हावय, ड्यूटी के शुरुआत म ही यदि मां के वंदना के जाए त येकर ले अच्छा बात का होही। छत्तीसगढ़ के राज्य गीत हमर राज्य के अस्मिता के चिन्हारी त हावय ही संग ही येकर गायन ले बन्धुत्व, प्रेम अउ छत्तीसगढ़ राज्य के प्रति अगाध श्रद्धा के भाव उत्तपन्न होवत  हावय। पुलिस अधीक्षक श्री पटेल ह बताइन के कानून बेवस्था के पालन अउ आन जरूरी ड्यूटी के बखत ये आदेश प्रभावी नइ होही।