रायपुर के नवा कलेक्टर डॉ. सर्वेश्वर नरेंद्र भुरे ह जरवाय गउठान अऊ आन बुता के लिस आरो

रायपुर। रायपुर के नव नियुक्त कलेक्टर डॉ. सर्वेश्वर नरेंद्र भुरे ह हीरापुर जरवाय गउठान म बने पेंट, पुट्टी प्लांट, वर्मी कंपोस्ट, सीएनडी प्लांट, यूथ हब प्रोजेक्ट, नालंदा परिसर, सेंट्रल लाइब्रेरी, ‘दक्ष’ आई.टी.एम.एस. अउ मरीन ड्राइव के निरीक्षण करिन। रायपुर नगर निगम कमिश्नर मयंक चतुर्वेदी तको उंकर संग रिहिस।

कलेक्टर डॉ. भुरे जरवाय गउठान म आयमूलक गतिविधी के उद्देश्य ले स्थापित पेंट, पुट्टी प्लांट के विस्तार ले जानकारी लिस। इहां स्व सहायता समूह ले जुरे महिला मन डहर ले गोबर ले प्राकृतिक पेंट अउ पुट्टी तइयार करे जात हावय, जेकर उपयोग भवन के पोताई के खातिर तको सुरू होगे हावय। गोबर ले तइयार ए प्राकृतिक पेंट के कीमत फिलहाल 230 रूपिया प्रति लीटर हावय, जेन मार्केट म कंपनी के पेंट के कीमत ले लगभग आधा हावय।

ओमन गउठान म स्व सहायता समूह के महिला मन डहर ले तइयार करे  वर्मी कंपोस्ट के तको जानकारी लिस। जरवाय सीएनडी प्लांट के भ्रमण करके ओमन तकनीकी टीम ले प्लांट के प्रोसेसिंग सिस्टम के बारे म विस्तार पूर्वक जानकारी हासिल करिस अउ वृक्षारोपण तको करिन।

रायपुर स्मार्ट सिटी लि. डहर ले साइंस कॉलेज मैदान म  युवा मनके खातिर तइयार करे  जात यूथ हब प्रोजेक्ट के तको भ्रमण करके ओमन संबंधित तकनीकी टीम के जरूरी दिशा निर्देश दिस। नालंदा परिसर अउ सेंट्रल लाइब्रेरी के तको भ्रमण  करके ओमन संबंधित मनले जानकारी लिस।  ‘दक्ष’ आई.टी.एम.एस. परिसर के भ्रमण करके ए अति आधुनिक कमान सेंटर के प्रचालन प्रणाली के बारे म ओमन विस्तार ले जानिस। संग ही नगर निगम के योजना शाखा डहर ले मरीन ड्राइव म संचालित प्रोजेक्ट के तको निरीक्षण करिन।