'दामिनी एप' बताही, कब गिरही बिजली अउ पानी

अम्बिकापुर। अब आकाशीय बिजली गिरे ले पहिली ही लोगन ल अलर्ट आरो मिल जही अउ किसान तको घर बइठे मौसम के पूर्वानुमान के जानकारी पा सकही। दरअसल भारत सरकार के पृथ्वी विज्ञान मंत्रालय के भारतीय उष्णदेशीय मौसम विज्ञान संस्थान पुणे डहर ले मोबाइल एप्प ‘‘दामिनी’’ लांच करे हावय जेकर ले आकाशीय बिजली गिरे  के अलर्ट पाये के संग ही किसान मनला मौसम के हर पल के जानकारी मिलही।

ए एप्प ले खेत म काम करत किसान मन या खुले म काम करइया आन लोगन ल बिजली गिरे ले पहिली ही सावधान रेहे के सूचना मिल जाही जेकर ले सुरक्षित ठऊर  म जा सकत हावयं।

दामिनी एप्प के खासियत-

ये एप्प 20 किलोमीटर के दायरा म बिजली गिरे के चेतावनी दिही। ए एप्प ले मोबाईल फोन म लोगन के वज्रपात के बारे म अलर्ट मिलही। ये एप्प नेटवर्क बिजली के गड़गड़ाहट अउ वज्रपात के गति के बारे म सटीक जानकारी दिही।

अइसे मिलही अलर्ट-

कहू एप्प म लाल रंग दिखही त 0 ले लेके 5 मिनट के अंदर बिजली गिरे के संभावना। पीला रंग होए म 5 ले 10 मिनट के भीतर अउ नीला रंग म  10 ले 15 मिनट के भीतर बिजली गिरे के संभावना होही। दामिनी एप्प ल बड़ आसानी ले अपन मोबाईल के प्ले स्टोर ले डाउनलोड कर सकत हावयं।