Dhamtari District News : शिशु संरक्षण महीना 13 सितम्बर ले 14 अक्टूबर चलही..., अंजोर छत्तीसगढ़ी म पढ़व पूरा खबर

अंजोर.धमतरी। प्रदेस सहित जिला म तको 13 सितम्बर ले 14 अक्टूबर तक शिशु संरक्षण महीना के आयोजन करे जाही। ए बखत कुल 10 सत्र म मंगलवार अउ सुकवार के आंगनबाड़ी या स्वास्थ्य केन्द्र म बिहनिया नौ ले संझा पांच बजे तक हितग्राही मन खातिर कार्यक्रम अउ गतिविधी संचालित करे जाही। मुख्य चिकित्सा अउ स्वास्थ्य अधिकारी डॉ. डी.के. तुर्रे ह बताइन के जिला म विटामिन ’ए’ सीरप के 75 हजार 999 अउ आयरन फोलिक सीरप के 80 हजार 468 हितग्राही लइका हावयं। ये लइका ल स्वास्थ्य अमले सहित आंगनबाड़ी कार्यकर्ता अउ मितानिन मन के जरिए दवई पिलाये जाही।

बताये गिस के नौ महीना ले पांच साल तक के लइका ल विटामिन ’ए’ सीरप छह महीना के अंतराल म पिलाये जाही। संग ही आयरन फोलिक एसिड सीरप तको दे जाही। कार्यक्रम के बखत लइका म पोषण स्तर के जांच के खातिर वजन लेके पोषण आहार के विषय म पालक के जानकारी दे जाही। अतिगंभीर कुपोषित बच्चा के चिन्हांकित करके पोषण पुनर्वास केन्द्र म भरती कराये जाही। जिला स्तर म येकर तइयारी पूरा कर ले गे हावय। छह महीना ले तीन साल तक के लइका के मितानिन के माध्यम ले गृह-भ्रमण के बखत सप्ताह म दू बार आयरन फोलिक एसिड सीरप पिलाये जाही अउ तीन ले पांच साल तक के अइसे लइका जेन आंगनबाड़ी म पंजीकृत हावयं, ओला आंगनबाड़ी कार्यकर्ता आयरन सीरप पिलाही।

ए संबंध म सबो अधिकारी, कर्मचारी मन के तको प्रशिक्षण दे गे हावय। कोविड 19 महामारी के दिशा-निर्देश मुताबिक शिशु संरक्षण महीना के आयोजन करे जाही। येकर तहत ग्रामीण/पंचायत स्तर ले लेके ब्लॉक अउ जिला स्तर तक एएनएम डहर ले बइठक, गृह भ्रमण या शिशु संरक्षण सत्र म फिजिकल डिस्टेंसिंग, थीड वॉशिंग अउ रेस्पीरेटरी हाइजीन के पालन करे जाही। मुख्य चिकित्सा अउ स्वास्थ्य अधिकारी ह जिला के सबो जनप्रतिनिधि, पालक अउ जनसामान्य ले अपील के हावय के वो शिशु संरक्षण महीना के बखत पांच साल तक के लइका के अपन नजदीकी शिशु संरक्षण बूथ म ले जाये के खातिर जरूर प्रेरित करें।