Dhamtari District News : ज़िला अस्पताल म होही अब फोकट म डायलिसिस, पहिली ही दिन ले आये लगिस मरीज.., अंजोर छत्तीसगढ़ी म पढ़व पूरा खबर

अंजोर.धमतरी। धमतरी के ज़िला अस्पताल म अब फोकट म डायलिसिस के सुविधा सुरू हो गे हावय। येकर ले एक तनि जिहां गरीब तबके के मरीज मन के फोकट म इलाज होही, उहें दूसर तनि ओला अब बहुत ही कम औपचारिकता पूरा करके अपन ज़िली म ही डायलिसिस कराये म सहूलियत होही। आज बिहनिया ही धमतरी नगरपालिक निगम के महापौर विजय देवांगन डहर ले ए डायलिसिस यूनिट के उद्घाटन करे गिस।

सबले पहिली डायलिसिस कराये बर शहर ले पांच किलोमीटर दूरिहा बसे गांव सेहराडबरी के कातिक राम ढीढ़ी अपन पुत्र के संग पहुंचिस। 50 साल के कातिक राम के पाछु चार साल ले किडनी के समस्या हावय। ए सेती ले ओला सप्ताह म दू बार डायलिसिस कराना पड़त हावय। येकर खातिर सुरू म त वो रायपुर निजी अस्पताल म जाये। फेर पाछु कुछ समय ले वो धमतरी के ही एक निजी अस्पताल म डायलिसिस कराये लगिस। इही बखत ओला अखबार अउ लोगन ले जानकारी मिलिस के ज़िला अस्पताल धमतरी म तको ये सुविधा सुरू होत हावय। वो येकर ले काफी राहत महसूस करत हाबे। एक त घर के नजदीक, ऊपर ले फोकट म डायलिसिस के सुविधा। इही सेती आज पहिली ही दिन वो अपन पुत्र महेश्वर ढीढी के संग ज़िला अस्पताल पहुंचगे।

ओपीडी म दस रूपिया के पर्ची कटा करके वो अपन रिपोर्ट लेके डॉक्टर ले मिलिय। ’हमर लैब’ म लहू जांच उक के औपचारिकता पूरा कराके अउ अस्पताल के डायलिसिस यूनिट म डायलिसिस कराये पहुंचिस। उंकर संग ही उंकर पुत्र अउ परिजन तको संतुष्ट हावयं के अब डायलीसिस के खातिर निजी अस्पताल के तनि रुख नइ करना होही। जानबा होवय के ओला सप्ताह म दू बार डायलिसिस कराना पड़त रिहिस। एक बार के औसतन खर्चा रायपुर म लगभग तीन हजार रूपिया अउ धमतरी म 2500 रूपिया आत रिहिस। ए रकम ले  ज़िला म इलाज के महीना के 20 हजार रूपिया के खर्चा रिहिस। किसान परिवार ले होए के सेती ले ये काफी महंगा हो जावे, फेर अब ढीढी खुश हावयं के ओला रायपुर के निजी अस्पताल जाना नइ होही अउ न ही डायलिसिस कराये बर सप्ताह पांच हजार रूपिया तक देही। घर के पास ही फोकट म डायलिसिस के सहूलियत जेन ज़िला अस्पताल म ही मिलगे हावय।