यूनिसेफ इंडिया ह छत्तीसगढ़ म न्यूट्रिशन के क्षेत्र म करे जा बुता ल सहराइन... अंजोर छत्तीसगढी म पढ़व पूरा खबर

अंजोर.रायपुर। मुख्यमंत्री भूपेश बघेल ले उंकर निवास कार्यालय म  यूनिसेफ इंडिया के प्रमुख यासूमासा किमुरा ह सौजन्य मुलाकात करिस। ओमन छत्तीसगढ़ म न्यूट्रिशन के क्षेत्र म जबर बुता के खातिर मुख्यमंत्री बघेल के बधाई दीस।  मुलाकात के बखत किमुरा ह छत्तीसगढ़ म कुपोषण मुक्ति अभियान के बढ़ई करत किहिन के लइका म कुपोषण अउ महिला मन म एनीमिया दूरिहा करे के खातिर राज्य म अच्छा काम होवत हाबे। किमुरा ह किहिन के मुख्यमंत्री के अगुवई म छत्तीसगढ़ म हेल्थ के क्षेत्र म होत बुता के सेती ले छत्तीसगढ़ के हेल्थ इंडेक्स म काफी उल्लेखनीय सुधार होइस। ये उत्साहजनक हावय, यूनिसेफ येकर ले काफी प्रभावित हावय।

श्री किमुरा ह मुख्यमंत्री के बताइन के यूनिसेफ इंडिया के टीम ह बस्तर अंचल के नारायणपुर, कोण्डागांव अउ बस्तर जिला के भ्रमण करिन रिहिस अउ उहां मुख्यमंत्री सुपोषण अभियान के करे  जात बुता ल लकठा ले देखिस। ओमन किहिन के मलेरिया उन्मूलन के क्षेत्र म तको काफी अच्छा काम होइस हावय। जेकर ले मलेरिया के मामला म कमी आये हावय। लोगन ल अच्छा स्वास्थ्य सुविधा मिलत हावयं अउ उंकर दिक्कत दूरिहायात हावयं। लोगन म स्वास्थ्य के प्रति जागरूकता बाढ़हे हावय। ए परिवर्तन के यूनिसेफ के टीम ह तको महसूस करिन हावय। छत्तीसगढ़ म यूनिसेफ के प्रमुख जॉब जकारिया सहित यूनिसेफ के सैम सुधीर बंडी, डॉ. अर्पणा देश पाण्डेय, विशाल वासवानी ए मउका म उपस्थित रिहिस।

जानबा होवय के मुख्यमंत्री भूपेश बघेल के पहल म कुपोषण अउ एनीमिया के समस्या के समाधान के खातिर बस्तर अंचल ले मुख्यमंत्री सुपोषण अभियान के सुरू रिहिस। जेमा मिले सफलता के देखत ए अभियान के पूरा राज्य म विस्तार करे गे हावय। मुख्यमंत्री सुपोषण अभियान ले छत्तीसगढ़ म लगभग 2 लाख 10 हजार लइका कुपोषण ले मुक्त हो चुके हावयं। इही रकम ले एक लाख महिला मन एनीमिया ले मुक्त हो चुके हावयं। ए अभियान के तहत लइका अउ महिला मन के स्थानीय पोषक आहार, गरम भोजन, अण्डा, चिक्की, मूंगफली, चना, कुछ ठऊर मन म मिलेट्स के संग रेडी-टू-ईट पूरक पोषण आहार दे जात हावय। ए अभियान म महिला स्व-सहायता समूह के मुख्य भागीदारी हावय।