अंजोर.रायपुर। 27 सितंबर ले अंतर्राष्ट्रीय क्रिकेट स्टेडियम म होवइया रोड सेफ्टी वर्ल्ड सीरीज क्रिकेट टूर्नामेंट म ए बार सुरक्षा के संग देखइया के सुविधा के बिसेस धियान रखे जाही। कलेक्टर डॉ सर्वेश्वर भुरे के अध्यक्षता म कलेक्टोरेट परिसर स्थित रेडक्रॉस सभा कक्ष म ए क्रिकेट टूर्नामेंट के सफलतापूर्वक आयोजन के संबंध म अधिकारी मनके बइठक लिस। कलेक्टर ह टूर्नामेंट के आयोजन सफलतापूर्वक सुनिश्चित हो सके येकर खातिर संबंधित विभाग के अधिकारी मनला जरूरी निर्देश देत किहिन के सबो अधिकारी अपन जिम्मेदारी, कर्तव्य के निर्वहन कुशलतापूर्वक अउ ईमानदारी ले करें। ए बार स्टेडियम परिसर म जुटे देखइया ल अच्छा मोबाइल कनेक्टीविटी के खातिर जियो अउ एयरटेल कंपनी डहर ले बिसेस सुविधा मिलही। कलेक्टर ह मोबाइल नेटवर्क के खातिर जरूरी सबो तैयारी, अस्थाई टॉवर उक के बेवस्था सुनिश्चित करे के निर्देश अधिकारी मनला दिस। कलेक्टर ह स्टेडियम के आस-पास बनाए जात पार्किंग जगह म तको पर्याप्त लाईट उक के संग सुरक्षा के इंतजाम करे के निर्देश तको अधिकारी मनला दिस। ओमन पार्किंग जगह सहित मैच के बखत तको स्टेडियम परिसर म सफाई बेवस्था के खातिर पर्याप्त संख्या म सफाई संगवारी अउ आन जरूरी मशीन अउ उपकरण के बेवस्था के निर्देश तको अधिकारी मनको दिस। ए बार मैच के बखत देखइया ले दोपहिया गाड़ी के खातिर 10 रूपिया अउ चार पहियां गाड़ी के खातिर 30 रूपिया पार्किंग शुल्क ले जाही। कलेक्टर ह पार्किंग जगह के समतलीकरण के काम अगले दू दिन म करे के निर्देश दिस।
कलेक्टर ह बइठक म उपस्थित आयोजक मंडल के प्रतिनिधि मन के पर्याप्त संख्या म टिकिट काउंटर स्थापति करे ल किहिन। येकर संग ही देखइया के सुविधा के खातिर परिसर म जगह-जगह साईनेज उक लगाये के तको निर्देश दिस। पिछली बार के रकम ले ए बार तको देखइया के रायपुर शहर ले स्टेडियम तक बस के सुविधा मिलही। कलेक्टर ह बॉयो टायलेट के संग आपात चिकित्सा बेवस्था उक तको सुनिश्चित करे के निर्देश अधिकारी मनको दिस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।