गोवंश चिकित्सा सेवा खातिर छत्तीसगढ़ म सुरू होही मुख्यमंत्री ‘गोवंश मोबाइल चिकित्सा योजना’

अंजोर.रायपुर। गोवंश के चिकित्सा सेवा के उद्देश्य ले मुख्यमंत्री भूपेश बघेल के निर्देश म छत्तीसगढ़ म मुख्यमंत्री गोवंश मोबाइल चिकित्सा योजना के शुरुआत करे जाही। पहिली चरण म सबोच जिला म एक या दू चिकित्सा गाड़ी ले ये योजना सुरू करे जाही। चरणबद्ध कार्यक्रम के तहत योजना के विस्तार करिन जाही।

राज्य के सबोच नागरिक के खातिर उत्तम स्वास्थ्य सुनिश्चित करे के खातिर विकासखंड ले लेके जिला मुख्यालय तक सर्वसुविधायुक्त सरकारी अस्पताल मन के संग मुख्यमंत्री स्लम स्वास्थ्य योजना अउ मुख्यमंत्री हाट-बाजार क्लीनिक योजना के संचालन करे जात हावय। येकर तहत मोबाइल मेडिकल यूनिट के माध्यम ले शहरी मजदूर बस्ती मन ले लेके दूरस्थ अउ दुर्गम जगह म रेहे वाला नागरिक तक बढि़या चिकित्सा सुविधा पहुंचत हावय।

इही तर्ज म अब पशुधन के संरक्षण अउ संवर्धन के बुता ल आगू बढ़ात गोवंश के उत्तम स्वास्थ्य के खातिर तको मोबाइल चिकित्सा गाड़ी के इस्तेमाल करे जाही। अभी के बेरा म सरकारी पशु-चिकित्सालय के संग राज्य म सुराजी गांव योजना के तहत बने गउठान म तको पशुधन के स्वास्थ्य के देखभाल के बेवस्था हावय। बढि़या पशु स्वास्थ्य के खातिर गउठान म चारागाह के तको विकास करे गिस, ताकि पशु मन के खातिर पौष्टिक चारे के बेवस्था होवत रिहिन। अब नवा योजना के माध्यम ले गोवंश के स्वास्थ्य सुविधा के अउ जादा विस्तार होही। मुख्यमंत्री भूपेश बघेल ह राज्य के मुख्य सचिव अमिताभ जैन ल ए संबंध म लघियात जरूरी कार्यवाही सुनिश्चित करे ल किहिन हावय।