मलखम्ब साधक के तन अउ मन ल स्वस्थ रखथे : मुख्यमंत्री भूपेश बघेल

अंजोर.रायपुर। मुख्यमंत्री ह मलखम्ब म जिम्नास्ट अउ योग के साधक के सराहना करिस। मुख्यमंत्री भूपेश बघेल ह बालोद म नवा बने इंडोर स्टेडियम के सुरू करिन अउ खिलाड़ी करत सुभकामना दीस। मुख्यमंत्री ह इंडोर स्टेडियम पहुंच के मलखम्ब म जिमनास्ट अउ योग  म भाग लेवइया मन के कलाकृति अउ अभ्यास ल देखके उंकर हौसला के सराहना करिस। मुख्यमंत्री ह किहिन के ये भारत के जुन्ना विधा हावय। मलखम्ब ले साधक मजबूत अउ तंदुरुस्त बने के संग ही तन अउ मन ले स्वस्थ होथे। ओमन इहां प्रशिक्षण म भाग लेवइया मन ल अपन आशीर्वाद अउ सुभकामना देत सरलग अभ्यास करे के खातिर प्रेरित करिन। ओमन प्रशिक्षक जिमनास्ट अउ योग के बारीकी ले अवगत कराइन अउ एला बढ़ावा दे के सुझाव दीस।

मुख्यमंत्री ह इहां नेशनल खिलाड़ी दीप्ति साहू, चंचल साहू, प्रेरणा साहू, करुण नायक, राजकुमार मुथाई, वीरेंद्र कुमार, उषा चौधरी ले भेंट करिस। ओमन तीन सगी बहिनी  दीप्ति, चंचल अउ प्रेरणा साहू के जज्बा अउ हुनर के सराहना करिस। दीप्ति साहू नेशनल गेम म केऊ मेडल जीत के जिला के नाम रोशन करिन हावय। इंडोर स्टेडियम म कलारी पट्टू, उशु, मुथाई, किक बॉक्सिंग, जूडो खेल के तको प्रशिक्षण दे जाथे। ये इंडोर स्टेडियम म पूर्व सैनिक सेवा संघ डहर ले फोकट म  प्रशिक्षण दे जाथे।

पूर्व सैनिक सेवा संघ के अध्यक्ष राजकुमार साहू ह बताइन के इहां अभी 70 युवा मनके सैनिक, अर्धसैनिक बल म भरती के खातिर जरूरी प्रशिक्षण दे जात हावय। पूर्व सैनिक किशोर नाथ योगी, हेमंत मारगिया, कन्हैया लाल, उमेश साहू डहर ले प्रशिक्षण दे जात हावय। इहां सन 1962 अउ 1965 के युद्ध म अपन वीरता के परिचय देवइया 70 साल के विमल कुमार दास युवा मनला प्रशिक्षण देत हावयं।