देवारी तिहार म मिलही राजीव गांधी किसान न्याय योजना के तीसरइया किस्त

अंजोर.रायगढ़। मुख्यमंत्री भूपेश बघेल ह रायगढ़ जिला के खरसिया विधानसभा के गांव चपले म भेंट मुलाकात कार्यक्रम म आम जनता ले रू-ब-रू होके राज्य शासन के योजना मनके क्रियान्वयन के जानकारी लिस। ओमन ए मउका म अपन सम्बोधन म देवारी तिहार म किसान मन के राजीव गांधी किसान न्याय योजना के तीसरी किस्त दे के घोसना करिस। मुख्यमंत्री ह जमीन के गुणवत्ता अउ उर्वरता के बनाए रखे के खातिर किसान मन ले वर्मी कम्पोस्ट के उपयोग करे के गेलौली करिन। ओमन किहिन के राज्य के गउठान म वर्मी कम्पोस्ट बनत हावय। येकर जादा ले जादा उपयोग करे जाना चाही। येकर पहिली मुख्यमंत्री ह छत्तीसगढ़ महतारी के पूजा अर्चना करके भेंट-मुलाकात कार्यक्रम के सुरू करिस।

मुख्यमंत्री ह के केऊ बड़े घोसना

चपले के भेंट मुलाकात कार्यक्रम म मुख्यमंत्री बघेल ह क्षेत्र के विकास के खातिर केऊ बड़े घोसना करिस। ओमन चपले म स्वामी आत्मानंद अंग्रेजी माध्यम स्कूल सुरू करे, काली महतारी मेला के हरेक साल आयोजन बर 10 लाख रूपिया के स्वीकृति, पुलिस मदद केंद्र चपले के पुलिस चौकी म उन्नयन, कोतरा म पुलिस मदद केंद्र के स्थापना, चपले म नवा सामुदायिक भवन अउ पीडीएस भवन के निर्माण, सामुदायिक स्वास्थ्य केंद्र खरसिया म  सोनोग्राफी अउ सीटी स्कैन जांच के सुविधा, खरसिया म बालक/बालिक ओबीसी छात्रावास के निर्माण, नहरपाली समपार म रेलवे ओवरब्रिज बनाये के स्वीकृति सहित गांव चपले म चार ठऊर मन म सीसी रोड बनाये के स्वीकृति के घोसना करिस।