कैबिनेट के बड़का फइसला : प्रदेस म छत्तीसगढ़िया ओलंपिक खेल के आयोजन

अंजोर.रायपुर। छत्तीसगढ़ म स्थानीय अउ पारंपरिक खेल ल बढ़ावा दे के दिशा म नवा पहल के गे हावय। इहां ए साल ले छत्तीसगढ़िया ओलंपिक खेल के आयोजन करे जाही। ये फइसला आज मुख्यमंत्री निवास कार्यालय म मुख्यमंत्री भूपेश बघेल के अध्यक्षता म होए कैबिनेट के बइठक म लिस। छत्तीसगढ़िया ओलंपिक म जिहां ग्रामीण अउ शहरी क्षेत्र म कबड्डी, खो-खो लेके टेनिस बाल क्रिकेट जइसे खेल प्रतियोगिता होही  त उहें ए ओलंपिक म लइका ले लेके सौ साल के बुजुर्ग तको बतौर भाग लेवइया हिस्सा ले सकही। खास बात ये के, इहां छत्तीसगढ़िया ओलंपिक खेल म सामिल होए के खातिर खिलाड़ी के छत्तीसगढ़ के स्थायी निवासी होना अनिवार्य हावय।

जानबा होवय के भूपेश बघेल ह बतौर मुख्यमंत्री शपथ ले के बाद छत्तीसगढ़िया संस्कृति अउ ग्रामीण परम्परा के आगू बढ़ाये के बिसेस पहल के हावय। मुख्यमंत्री बघेल खुद तको केऊ मउका म पारंपरिक खेल म हाथ आजमात नजर आत हावयं। मुख्यमंत्री के पारंपरिक खेल ले लगाव ए रकम ले ले तको देखे ल मिले  हावय कि, भेंट-मुलाकात समेत उंकर कार्यक्रम के बखत वो लइका के बीच पहुंच के भौंरा-बांटी, गिल्ली-डंडा, पिट्ठुल खेले हावयं। 

चार स्तर म छत्तीसगढ़िया ओलंपिक के आयोजन-

छत्तीसगढ़िया ओलंपिक खेल-2022 म कबड्डी, खो-खो, गेड़ी, पिट्ठुल, व्हॉलीबाल, हॉकी अउ टेनिस बाल क्रिकेट के सामिल करे गिस। ये खेल के मुकाबले पुरूष अउ महिला दुन श्रेणी म होही। उहें ये इहां ओलंपिक खेल चार स्तर गांव पंचायत, ब्लॉक, जिला अउ राज्य स्तर म होही। राज्य स्तर म छत्तीसगढ़िया ओलंपिक खेल के आयोजन राजधानी रायपुर म होही। ये खेल के आयोजन म तकनीकी मदद बर छत्तीसगढ़ खेल विकास प्राधिकरण ल खेल प्रशिक्षक, राज्य अउ जिला खेल संघ के प्रतिनिधि अउ शिक्षा विभाग के शारीरिक शिक्षक मन के सहयोग ले जाही।

राष्ट्रीय अउ अंतर्राष्ट्रीय प्रतियोगिता के खातिर प्रशिक्षण-

छत्तीसगढ़िया ओलंपिक खेल-2022 के प्रतिभाशाली खिलाड़ी के खेल प्रशिक्षक (कोच) राष्ट्रीय अउ अंतर्राष्ट्रीय प्रतियोगिता के खातिर तइयार करही। एथलीट के खातिर राष्ट्रीय अउ अंतर्राष्ट्रीय स्तर म बतौर खिलाड़ी करियर ल बढ़ाये के ये सुनहरा मउका हावय।

खेल आयोजन के खातिर होही कमेटी-

प्रदेश सरकार डहर ले गांव पंचायत मन अउ 146 ब्लॉक स्तर म होए वाला खेल आयोजन के खातिर आने-आने कमेटियां गठित के जाही। गांव पंचायत स्तर म गठित कमेटियों के संयोजक सरपंच होही अउ ब्लॉक स्तर म गठित कमेटी के संयोजक विकासखंड अधिकारी होही। खेल म हिस्सा ले वाला खिलाड़ी के भोजन, आवागमन अउ आन सुविधा के खातिर गांव पंचायत मन अउ विकासखण्ड के खातिर बजट उपलब्ध कराइन जाही।