जेईई एडवांस म प्रयास अउ एकलव्य के शानदार प्रदर्शन

अंजोर.रायपुर। आईआईटी-एनआईटी अउ केन्द्र सरकार ले वित्तपोषित इंजीनियरिंग संस्थान म प्रवेश बर प्रतिष्ठित जेईई परीक्षा के इतवार के घोसित परिणाम म आदिम जाति विभाग डहर ले संचालित प्रयास अउ एकलव्य के पढ़इया लइका ह शानदार प्रदर्शन करिन हावय। ए साल जईई एडवांस 2021-22 बर प्रयास अउ एकलव्य आवासीय स्कूल मन के परीक्षा म बइठे कुल 217 पढ़ईया मन म ले 54 ह जेईई क्वालीफाई करिन हावय, जबकि 34 पढ़ईया मन के उंकर रैंक के आधार म आईआईटी, एनआईटी अउ समकक्ष इंजीनियरिंग कॉलेज म प्रवेश संभावित हावय।

मिले आरो के मुताबिक दस पढ़ईया मन के मिले रैंक के आधार म देश के कोनो प्रतिष्ठित आईआईटी कॉलेज म आसानी ले प्रवेश होही। येकर अलावा ड्रॉपर्स बैच के परीक्षा म बइठे कुल 12 पढ़ईया मन म ले 07 न क्वालीफाई करिन हावय अउ 01 पढ़ईया के रैंक के आधार म आईआईटी म प्रवेश हो जाही। पढ़ईया मन के ए उपलब्धि म मुख्यमंत्री भूपेश बघेल, विभागीय मंत्री डॉ. प्रेमसाय सिंह टेकाम, सचिव आदिम जाति विभाग डी.डी. सिंह अउ आयुक्त श्रीमती शम्मी आबिदी ह सुभकामना देत उंकर उज्जवल भविष्य के कामना के हावय।