अंजोर.रायपुर। रायपुर ज़िला म अवैध प्लाटिंग म एक बार फेर ज़िला प्रशासन ह बड़का कार्रवाई करे हावय। अवैध प्लाटिंग के शिकायत के गंभीरता ले लेवत कलेक्टर डॉ सर्वेश्वर भुरे ह आज अभनपुर अउ उरला क्षेत्र म 45 खसरा म दर्ज लगभग 29 एकड़ जमीन के रजिस्ट्री म प्रतिबंध लगे दे हावय। कलेक्टर ह अभनपुर अउ उरला क्षेत्र म होत जमीन के रजिस्ट्री म उप पंजीयक के गंभीरता ले सावधानी बरते के निर्देश दे हावय। डॉ भूरे ह छत्तीसगढ़ कॉलोनाइजर एक्ट के तहत अवैध प्लाटिंग करइया के विरुद्ध कड़ाई ले कार्रवाई करे के तको निर्देश राजस्व अधिकारी मनला दे हावय।
कलेक्टर डॉ भूरे ह अभनपुर के पटवारी हल्का नम्बर 15 के 24 खसरा अउ उरला के पटवारी हल्का नम्बर 23 के 21 खसर के जमीन के खरीदी बिक्री प्रतिबंधित करे हावय। कलेक्टर के निर्देश म ये सबो खसर के ई-पंजीयन सॉफ्टवेयर म प्रतिबंधित खसर के श्रेणी म दर्ज कर दे हावय। अब ये खसर के भूमि के खरीदी-बिक्री रजिस्ट्री नइ हो पाही। कलेक्टर डॉ भुरे ह ज़िला म अवैध प्लाटिंग अउ अवैध बनाये के जांच करके कार्रवाई करे के निर्देश तको संबंधित राजस्व अधिकारी मनला दे हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।