मुख्यमंत्री भूपेश बघेल ल बस्तर दशहरा के नेवता... अंजोर छत्तीसगढी म पढ़व पूरा खबर

अंजोर.रायपुर। मुख्यमंत्री भूपेश बघेल ले उंकर निवास कार्यालय म उद्योग मंत्री कवासी लखमा अउ बस्तर सांसद दीपक बैज के अगुवई म बस्तर दशहरा समिति जगदलपुर के प्रतिनिधि मण्डल ह सौजन्य मुलाकात करिस। ओमन मुख्यमंत्री के विश्व परसिध बस्तर दशहरा परब 2022 म सामिल होए के नेवता दीस। मुख्यमंत्री ह बस्तर दशहरा म नेवता खातिर प्रतिनिधि मण्डल ल धन्यवाद देत आयोजन के सफलता के खातिर सुभकामना दीस।

जानबा होवय के 75 दिवसीय विश्व परसिध बस्तर दशहरा परब हरेली अमावस्या ले सुरू होके आश्विन शुक्ल पक्ष के 13वें दिन तक मनाये जाथे। देश के तीन भाग म दशहरे के आने पहचान हावय, मैसूर (कर्नाटक) अउ किन्नौर (हिमाचल प्रदेश) के अलावा छत्तीसगढ़ के बस्तर के दशहरा अपन आप म अनूठा हावय। चालुक्य नरेश पुरूषोत्तम देव डहर ले पुरी के जगन्नाथ मंदिर जाके रथपति के उपाधि के संग वापस लौटे के चिन्हारी स्वरूप रथ परब गोंचा परब अउ दशहरा के आयोजन करे जाथे। अभी के बेरा म बस्तर के निवासी मन डहर ले बस्तर अंचल के प्रमुख आराध्य देवी मां दन्तेश्वरी के सम्मान म श्रद्धापूर्वक दशहरा मनाये जाथे। बस्तर दशहरा इहां के समृद्ध सांस्कृतिक विरासत अउ सामाजिक समरसता के चिन्हारी हावय। ए परब म समाज के सबोच वर्ग के खातिर बुता करार हावय। बस्तर दशहरा हर साल उत्साह अउ उमंग के संग मनाये जाथे। बस्तर दशहरा देखे के खातिर देश-विदेश ले हजार पर्यटक हर साल बस्तर आते हावयं।

मुख्यमंत्री ल नेवता देबर रायपुर आए प्रतिनिधि मण्डल म जगदलपुर विधायक रेखचंद जैन, परगनाकरेकोट के मंगलु मांझी, बारसूर परगना अर्जुन कर्मा, बलराम मांझी, दंतेश्वरी मंदिर के पुजारी विजेन्द्र सहित केऊ मांझी, चालकी, मेम्बर-मेम्बरीन सामिल रिहिस।