राष्ट्रीय पोषण महीना - सत्य साईं संजीवनी अस्पताल म एक दिवसीय कार्यशाला अउ व्याख्यान के आयोजन..., अंजोर छत्तीसगढ़ी म पढ़व पूरा खबर

अंजोर.रायपुर। राजधानी रायपुर के सत्य साईं संजीवनी अस्पताल म इंडियन डाइटेटिक एसोसिएशन एंड नेट प्रोफेन छत्तीसगढ़ चैप्टर अउ सरकारी दुधाधारी बजरंग महिला कॉलेज के समिलहा तत्वावधान म एक दिवसीय कार्यशाला अउ व्याख्यान के आयोजन करे गिस। ये व्याख्यानमाला म माई पहुना के रूप म डॉ अरुणा पलटा कुलपति हेमचंद यादव विश्वविद्यालय दुर्ग ह अपन संबोधन म किहिन के  स्वस्थ रेहे  के खातिर दैनिक आहार म पानी के सेवन पर्याप्त मात्रा म करना चाही, भोजन के अन्त म दही, नींबू पानी के सेवन करें, फल अउ सब्जी के जादा ले जादा  प्रयोग करें। सरलग रुप ले सबो ल व्यायाम करना चाही संग ही तनाव रहित रेहे के तको प्रयास करना चाही।

यूनिसेफ के अधिकारी ह राज्य म चल रिहिन सबो पोषण योजना मन के जानकारी दीस। सत्य साईं अस्पताल के चीफ डाइटिशियन कविता किरण साहू ह सत्य साईं अस्पताल के डहर ले दे जात डाइट के सरी जानकारी दीस। अंत म गिफ्ट ऑफ गिफ्ट के माध्यम ले उन सबो लइका ल सर्टिफिकेट अउ उपहार दीस  जेकर सफलतापूर्वक ऑपरेशन सत्य साईं अस्पताल के डहर ले करे गिस। सत्य साई हॉस्पिटल के कर्मचारी अउ  अधिकारी मनके डहर ले व्यंजन प्रतियोगिता के तको आयोजन करे गिस जेमा विजयी भाग लेवइया मन के पुरस्कृत करे गिस।