शिक्षक दिवस म मुख्यमंत्री भूपेश बघेल के तीन बड़े फैसला

सप्ताह म एक दिन स्कूल म छत्तीसगढ़ी बोली
स्वामी आत्मानंद अंग्रेजी माध्यम स्कूल म संस्कृत अउ कंप्यूटर शिक्षा

अंजोर.रायपुर। मुख्यमंत्री भूपेश बघेल ह शिक्षक दिवस म छत्तीसगढ़ के पढ़इया लइका खातिर तीन फइसला ले हावयं। राज्य म छत्तीसगढ़ी  भाषा के बढ़ावा दे के खातिर सबो स्कूल म अब सप्ताह म एक दिन छत्तीसगढ़ी अउ आदिवासी बोली के शिक्षा दे जाही। येकर खातिर शैक्षणिक सामान तको तइयार के हावय।  बस्तर अउ सरगुजा क्षेत्र म उहां के स्थानीय आदिवासी बोली के मुताबिक अउ बांचे क्षेत्र म छत्तीसगढ़ी भाषा म पाठ्य सामान तइयार के जात हावय। सप्ताह म एक दिन छत्तीसगढ़ी भाषा म पढ़ाई ले स्थानीय भाषा ल बढ़ावा मिलही अउ पढ़इया लइका म पढ़ाई के प्रति लगाव होही।

मुख्यमंत्री भूपेश बघेल ह एक अउ बड़का घोसना करत किहिन हावय के भारत के संस्कृति अउ परंपरा के बढ़ावा दे के खातिर स्वामी आत्मानंद अंग्रेजी माध्यम स्कूल म संस्कृत विषय के तको पढ़ाई होही। संग म स्वामी आत्मानंद अंग्रेजी माध्यम स्कूल म कंप्यूटर शिक्षा के तको मुख्यमंत्री ह अनिवार्य करे के बात कहे हावय। मुख्यमंत्री बघेल ह महात्मा गांधी के जिक्र करत किहिन हावय के शिक्षा अइसे होना चाही जेन बालक के शारीरिक, मानसिक अउ बौद्धिक विकास करे अउ इही के धियान म रखत छत्तीसगढ़ सरकार शिक्षा ल बढ़ावा दे के खातिर नवाचार ल अपनात हावय।