अंजोर.रायपुर। अंतर्राष्ट्रीय सियान दिवस के मउका म समाज कल्याण विभाग डहर ले राजधानी रायपुर के सरदार बलबीर सिंह जुनेजा इनडोर स्टेडियम म राज्य स्तरीय सम्मान समारोह के आयोजन करे गिस। कार्यक्रम म विधानसभा अध्यक्ष डॉ चरणदास महंत, समाज कल्याण मंत्री श्रीमती अनिला भेंड़िया, छत्तीसगढ़ योग आयोग के अध्यक्ष ज्ञानेश शर्मा सहित आने-आने जिला ले आए लगभग तीन हजार बुजुर्ग सामिल होइस। ए मउका म विशिष्ठ पहुना मन डहर ले सूफी गायक पद्मश्री मदन चौहान अउ समाज सेविका पद्मश्री श्रीमती शमशाद बेगम सहित 16 वरिष्ठजन के समाज के प्रति उंकर उल्लेखनीय योगदान के खातिर शॉल, श्रीफल अउ चिन्हारी चिनहा ले सम्मान करिन।
मंत्री श्रीमती अनिला भेड़िया ह बुजुर्ग मनला अंतर्राष्ट्रीय सियान दिवस के बधाई अउ सुभकामना देत होइस किहिन के छत्तीसगढ़ के संस्कृति, सम्मान अउ सभ्यता बुजुर्ग ले जुरे हावय। समिलहा परिवार म रेहे के प्रथा आन राज्य के तुलना म हमर राज्य म श्रेष्ठ हावय। ओमन बुजुर्ग के खातिर सुखमय जीवन के मंगल कामना करत किहिन के राज्य सरकार डहर ले बुजुर्ग के कल्याण के खातिर हर संभव प्रयास करे जा रिहिन हावयं। अंतर्राष्ट्रीय सियान मन दिन के मउका म मुख्यमंत्री भूपेश बघेल ह बुजुर्गों के खातिर एक नवंबर, राज्य बनाये दिन ले सियान हेल्पलाइन सुरू करे के बड़े घोसना के हावय। ये हेल्पलाइन अइसे वृद्धजन, जेकर संतान देश-विदेश के आन ठऊर मन म कार्यरत हावयं, ओला आपात स्थिति म मदद पहुंचाये म मदद करही। ओमन किहिन के प्रदेस म 31 वृद्धाश्रम संचालित हावय। इहां निराश्रित बुजुर्ग के खातिर खाना पीना ले लेके आश्रय, चिकित्सा के बेवस्था करे गे हावय। जिला ले लेके राज्य स्तर म बुजुर्ग के समस्या निवारण के बेवस्था राज्य सरकार ह के हावय। येकर खातिर सबो बुजुर्ग के सतर्क अउ जागरूक होए के जरूरत हावय। ओमन किहिन के छत्तीसगढ के विकास म बुजुर्ग के तको अहम योगदान हावय। नवा छत्तीसगढ़ गढ़े के खातिर बुजुर्ग के आशीर्वाद जरूरी हावय। अच्छा माहौल अउ सबके सहयोग ले ही हम नवा छत्तीसगढ़ के सपना साकार करे म सफल होही।
ये मउका म डॉ. चरणदास महंत ह किहिन के बुजुर्ग के प्रति पहिली जिम्मेदारी उंकर लइका के संग पूरा समाज के हावय। राज्य सरकार ह पेंशन सहित बुजुर्ग के जरूरत के खातिर कई व्यवस्था करे हावय। अब बुजुर्ग के मदद के खातिर हेल्पलाइन तको सुरू हावय। ओमन किहिन के बुजुर्ग के खातिर आत्मीयता अउ मान-सम्मान सबले बड़े जरूरत हावय ए दिशा म नौजवान ल सोचना होही।
श्री ज्ञानेश शर्मा ह किहिन के एकाकी परिवार के सेती ले बुजुर्ग बहुत प्रभावित अउ उपेक्षित होइस हावयं। भौतिकतावाद के सेती सामाजिक ताना-बाना बिखर रिहिन हावय। ओमन किहिन के बुजुर्गों के अनुभव के लाभ युवा पीढ़ी के लेना चाही। नवा पीढ़ी प्रेरणा लेके सम्मान के वातावरण फेर ले लाए।
अंतर्राष्ट्रीय वृद्धजन दिवस म होइस सम्मान - रायपुर ले पद्मश्री मदन चौहान ल कला साधना के खातिर डॉ. चितरंजन कर ल साहित्य साधना के खातिर सम्मान करे गिस। बालोद जिला ले पद्मश्री श्रीमती शमशाद बेगम ल साक्षरता अभियान अउ सामाजिक बुराई के प्रति जागरूकता म उल्लेखनीय योगदान के खातिर सम्मान करे गिस। इही रकम ले बिलासपुर के नित्यानंद शर्मा ल स्वच्छता अभियान म सक्रिय सहभागिता के लिए, बलरामपुर जिला के बिरझु सिंह ल स्वच्छता अउ खैरवार जनजाति के उत्थान के खातिर सम्मान करे गिस। बस्तर ले नवी मोहम्मद ल वरिष्ठ नागरिक के स्वास्थ्य के प्रति जागरूक करे अउ निराश्रित के मदद के खातिर सम्मान करे गिस। कांकेर जिला के राजूराम मरकाम ल स्वास्थ्य शिविर, फोकट म उपचार के खातिर अउ धमतरी के लखमशी भाई भानुशाली ल निराश्रित लइका अउ बुजुर्ग के कल्याणार्थ बुता के खातिर सम्मान करे गिस। बलौदाबाजार जिला के मिक्खा सिंह सम्मान ले सम्मानित सरजू साहू के उंकर खेलकूद प्रतिभा के खातिर सम्मानित करे गिस। धमतरी के अश्विनी गजेंद्र ल महिला मन के स्वावलंबी बनाने, गरियाबंद के नूतन लाल साहू ल रचनात्मक लेखन अउ गतिविधि, सरगुजा के मंगा राम ल कोविड-19 संक्रमणकाल म सामाजिक बुता के खातिर सम्मान करे गिस। इही रकम ले नारायणपुर जिला के श्रीमती एन.के. आजाद ल लइका के शिक्षा, वरिष्ठ नागरिक अउ निराश्रित के सेवा के खातिर सम्मानित करे गिस। मुंगेली जिला के अशोक तिवारी ल स्काउट शिक्षा अउ योग प्रशिक्षण के लिए, कोण्डागांव जिला के खेम वैष्णव ल उंकर लोक चित्र के लिए, दंतेवाड़ा जिला के अमर सिंह ठाकुर ल सामाजिक बुता म सहयोग के खातिर प्रशस्ति पाती दे गिस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।