36वां राष्ट्रीय खेल: छत्तीसगढ़ म दूसरा दिन तको आइस पदक

अंजोर.रायपुर। देश म आयोजित 36वां राष्ट्रीय खेल के बखत दूसरा दिन तको छत्तीसगढ़ के हिस्सा म पदक आइस। फेंसिंग के व्यक्तिगत मुकाबला म छत्तीसगढ़ राज्य के अंतरराष्ट्रीय खिलाड़ी आर.एस. शरजील ह रजत पदक हासिल करिन। राष्ट्रीय खेल के बखत फेंसिंग म फायनल तक पहुंचे अउ उत्कृष्ट खेल के प्रदर्शन करत रजत पदक हासिल करे म शरजील ल मुख्यमंत्री भूपेश बघेल, खेल अउ युवा कल्याण मंत्री उमेश पटेल ह बधाई अउ सुभकामना दीस हावयं।

खेल संचालक श्रीमती श्वेता श्रीवास्तव सिन्हा, छत्तीसगढ़ फेंसिंग संघ के अध्यक्ष एस. भारतीदासन, सचिव मो. बशीर खान, कोच वी. जॉनसन सोलोमन, मैनेजर अखिलेश दुबे सहित शेफ डी मिशन डॉ. अतुल शुक्ल, डिप्टी शेफ डी मिशन रुपेंद्र सिंह चौहान ह तको बधाई दीस अउ उपस्थित होके खिलाड़ी के उत्साह बढ़ाइस। शरजील जूनियर अउ सीनियर एशियन चैम्पियनशिप अउ फेंसिंग कॉमनवेल्थ म देश के प्रतिनिधित्व करके चुके हावयं। जानबा होवय के सात साल बाद भारत म राष्ट्रीय खेल के आयोजन होवत हाबे। 36वां राष्ट्रीय खेल के मेजबानी गुजरात राज्य करत हावय।