बिहान योजना ले जुड़के समुह के दीदी मनला मिलगे सपना के पंख, मछली पालन ले 2 लाख ले जादा के करिस आमदनी

अंजोर.बिलासपुर। ग्रामीण क्षेत्र म रहइया महिला मन अउ नोनी ल स्व सहायता समूह के रूप म गठित करके अउ ओला प्रेरित करके स्व रोजगार ले जोड़े जाये के महत्वकांक्षी योजना हावय बिहान। आज छत्तीसगढ राज्य ग्रामीण आजीविका मिशन बिहान के महिला मन समूह ले जुड़के सफलता के नवा कहानी लिखत हावय अउ अपन सपना ल पंख दे करके नवा उड़ान के खातिर तइयार हावय। तीनों स्तर के पंचायत मन अउ बिहान टीम के मदद ले ये महिला मन ल सशक्त अउ आत्मनिर्भर बनाये के खातिर हर संभव प्रयास करे  जात हावय।

विकासखंड बिल्हा के गांव पंचायत रहंगी म चांदनी महिला स्वयं सहायता समूह के गठन राष्ट्रीय ग्रामीण आजीविका मिशन (बिहान) के तहत करे गिस। ए समूह म कुल 11 सदस्य हावय। ए योजना ले जुड़के समूह के महिला मन ल 2 लाख ले जादा के आमदनी हो चुके हावय। ये दीदी के परिवार व्यक्तिगत रूप ले कृषि अउ गैर कृषि बुता म संलग्न हावयं अउ ये इंकर परिवार के आय के एक प्रमुख स्त्रोत तको हावय। योजना ले जुड़े के बाद एमन ल उपराहा आय के साधन मिलगे। समाज म तको उंकर मान अब बढ़ गे हावय।

बिहान योजना के तहत समूह के मिले वित्तीय मदद अउ लाभ ह ए समूह के दीदी ल जादा प्रभावित करिन अउ सबो दीदी मन ह मिलके एक समूह के गठन करिन अउ येकर माध्यम ले मिले वाला वित्तीय मदद अउ लाभ लेके आर्थिक रूप ले अपन परिवार ल मजबूत बनाये के फइसला लिस। समूह के अध्यक्ष श्रीमती अंजली श्रीवास अउ सचिव श्रीमती मीना ध्रुव हावय। बिहान योजना ले जुडे बाद समूह के सबो दीदी ल बिहान योजना के तहत 15 हजार रूपिया मिलिस। येकर एक साल के बाद समूह के सामूदायिक निवेश कोष के रकम 60 हजार होइस। ए रकम के उपयोग करत हो समूह के दू दीदी ह अपन परिवार के आय बढ़ाये के उद्देश्य ले किराना दुकान अउ बाड़ी विकास के बुता सुरू करिन। समूह ह गांव म ही बने तरिया म सामुहिक रूप ले मछली पालन करे के योजना बनाये अउ ए बर आवेदन दिस। येकर अलावा समूह के दीदी ह अपन आय के साधन बढाने के खातिर विकासखंड परियोजना प्रबंधन इकाई के टीम के मदद ले लोन बर आवेदन बैंक म प्रस्तुत करिन। जेकर ले समूह के लोन के रूप म बैंक ले 50 हजार रूपिया के मदद रकम मिलिस।

ए रकम म ले 17 हजार रूपिया के रकम के उपयोग करत होइस समूह ह मछली पालन के बुता सुरू करिन। समूह के दीदी मछली पालन के बुता करत तीन साल ले जादा हो चुके हावय दीदी के ए बुता ले अच्छा आमदनी तको मिलत हावय। ए बुता ले समूह के अब तक 2 लाख 9 हजार रूपिया आय होए हावय। जेकर ले सबो समूह के दीदी मन काफी उत्साहित हावय। चांदनी महिला समूह के सबो दीदी ह राष्ट्रीय ग्रामीण आजीविका मिशन बिहान योजना ले जुड़के गांव के आन महिला मन के आर्थिक रूप ले सशक्त बने बर प्रेरणा दे रेहे हावय।