मुख्यमंत्री निवास म गोवर्धन पूजा : सुवा, गौरी गौरा अउ राउत नाचा संग ठेठ छत्तीसगढि़या अंदाज म मनाइस तिहार

अंजोर.रायपुर। मुख्यमंत्री भूपेश बघेल ह निवास म गौरी गौरा के पूजा करके गोवर्धन अउ देवारी तिहार के मनाइन। ए मउका म मुख्यमंत्री के सलाहकार प्रदीप शर्मा छत्तीसगढ़ खनिज विकास निगम के अध्यक्ष गिरीश देवांगन, छत्तीसगढ़ खादी अउ ग्रामोद्योग बोर्ड के अध्यक्ष राजेंद्र तिवारी, छत्तीसगढ़ नागरिक आपूर्ति निगम के अध्यक्ष राम गोपाल अग्रवाल छत्तीसगढ़ महिला आयोग के अध्यक्ष डॉ किरणमयी नायक, जिला सहकारी बैंक अध्यक्ष पंकज शर्मा, इंदिरा कला अउ संगीत विश्वविद्यालय के कुलपति श्रीमती ममता चंद्राकर, इंदिरा गांधी कृषि विश्वविद्यालय के कुलपति डॉ गिरीश चंदेल, प्रजापिता ईश्वरीय विश्वविद्यालय के प्रमुख कमला दीदी सहित केऊ जनप्रतिनिधि अउ गणमान्य नागरिक उपस्थित रिहिस। मुख्यमंत्री ह गोवंश के प्रति कृतज्ञता के चिन्हारी परब म गौ महतारी ल अपन हाथ ले खिचड़ी खिलाके परंपरा के निर्वहन करिन।

मुख्यमंत्री भूपेश बघेल ह अपन धर्मपत्नी श्रीमती मुक्तेश्वरी बघेल अउ परिवार के सदस्य मन के संग गौरा-गौरी अउ गोवर्धन पूजा के अउ गौमाता ल खिचड़ी खिलाके प्रदेस के सुख-समृद्धि अउ खुसयाली के मंगलकामना करिस। छत्तीसगढ़ म गोवर्धन पूजा के दिन गाय के पूजा करे के परम्परा हावय। गाय ल सजा-धजा के उंकर पूजा करके खिचड़ी खिलाये जाथे अउ गोधन के रूप म अमूल्य जिनिस के खातिर श्रद्धा अउ आभार प्रकट करे जाथे। 

गोवर्धन अउ देवारी तिहार के मउका म महिला लोक कलाकार मन ह छत्तीसगढ़िया वेशभूषा म मनमोहक सुआ नृत्य प्रस्तुत करिन। जय मां सरस्वती समूह के महिला मन ह सुआ नृत्य के शानदार प्रस्तुति ले देखइया के मंत्रमुग्ध कर दीस। देवारी तिहार म छत्तीसगढ़ के गांव-गांव म सुआ नृत्य के परंपरा हावय, धौराभांठा के कलाकार मन डहर ले बड़े उत्साह के संग छत्तीसगढ़िया वाद्य यंत्र अउ पारंपरिक वेशभूषा के संग राउत नाचा प्रस्तुत करे जात हावय।

छत्तीसगढ़ म यादव समाज के लोगन गोवर्धन पूजा के दिन गाव अउ शहर म राउत नाचा करत हावय। ए नृत्य म पशुधन के वृद्धि, फसल उत्पादन बढ़ाये के कामना के संग ही सबो के मंगलकामना के जात हावय। ये मउका म मुख्यमंत्री ह पारंपरिक वेशभूषा म राउत नर्तक दल के बीच पहुंच के उंकर उत्साह बढ़ाइस। यादव समाज डहर ले राउत नाचा के शानदार प्रस्तुति म मुख्यमंत्री अपन आप ल नइ रोक सहिस अउ राउत नाचा नर्तक दल के संग पारंपरिक वेशभूषा म दल म सामिल होइस। ओमन गाड़ा बजा के धुन म नर्तक दल के सदस्य के कदम ले कदम मिलाके राउत नाच म उंकर संग दीस। मुख्यमंत्री भूपेश बघेल ह अपन चिर-परिचित अंदाज म ए मउका म लोक कलाकार मन ल प्रोत्साहन करत दोहरा तको पारिस।