पिहरीद पहुंचके रेस्क्यू ऑपरेशन ले सुरक्षित निकाले राहुल के परिवार ले फेर मिलिस मुख्यमंत्री भूपेश बघेल, परिवार करिन धन्यवाद.., अंजोर छत्तीसगढ़ी म पढ़व पूरा खबर

अंजोर.जांजगीर। मुख्यमंत्री भूपेश बघेल ह देश के सबले बड़े रेस्क्यू ऑपरेशन ले सुरक्षित निकाले नन्हे लइका राहुल के गांव पिहरीद म घर जाके उंकर घर वाला ले मुलाकात करिस। मुख्यमंत्री ह घर वाला ले गोठबात करत पहिली वो बोर जगह के तको निरीक्षण करिन जिहां राहुल ल बचाये के खातिर बड़ा गढ्ढा खोदा गे रिहिस। निरीक्षण के बखत विधायक रामकुमार यादव तको उपस्थित रिहिन।

राहुल के पिता राम कुमार यादव ह मुख्यमंत्री भूपेश बघेल ल बताइन के राहुल अभी रायपुर म रिहिके पढ़ाई करत हावय। ओमन मुख्यमंत्री ल साल श्री-फल भेंट करके स्वागत करिन अउ राहुल ल बचाये म मदद के खातिर धन्यवाद दिस। मुलाकात के बखत राहुल के महतारी गीता देवी ह तको मुख्यमंत्री ले बातकरके उंकर आभार जताइस।

जानबा होवय के 10 जून के राहुल घर के पाछु बोरवेल के 80 फीट गहरा गड्ढा म गिर गे रिहिस। सेना, एनडीआरएफ, एसडीआरएफ, एसईसीएल, जिला अउ पुलिस प्रशासन के 500 लोगन ह 104 घंटा रेस्क्यू ऑपरेशन करके ओला बोरवेल के गड्ढे ले निकाले रिहिस। राहुल के 5वां दिन 15 जून के बोरवेल ले निकाले गिस अउ ओला बिलासपुर के अपोलो अस्पताल म भरती कराइन। देशभर के नजर राहुल के स्वास्थ्य ल लेके लगे रिहिस, मुख्यमंत्री भूपेश बघेल स्वयं ए ऑपरेशन के पल-पल के जानकारी लेत रिहिस।