मत्स्य विभाग के तकनीकी मार्गदर्शन अउ विभागीय योजना ले लाभान्वित होवथे जिला के किसान

अंजोर.बीजापुर। जिला म कृषि ल बढ़ावा दे अउ किसान मनला आने-आने योजना मन ले लाभान्वित करके उंकर आमदनी के स्त्रोत बढ़ाये बर विभागीय अमला जमीनी स्तर म बुता करत हावय। मांझीगुडा निवासी किसानमंगलदई मांझी ह मछली पालन ले ही साल भर म तीन लाख ले जादा आमदनी पाये हावय। मांझीगुडा निवासी किसानअपन एक हेक्टेयर तरिया म मछरी विभाग के तकनीकी मार्गदर्शन म मछलीपालन के बुता करत हावय।

विभाग डहर ले शतप्रतिशत अनुदान म जाल अउ मछली बीजहा प्रदाय करे गे हावय। साल भर म 15 क्विंटल ले जादा मछली उत्पादन होवत  हावय। जेला 200 रूपिया प्रति किलो के हिसाब ले 3 लाख रूपिया ले जादा लाभ अर्जित करत हावय, मछली पालन के संग-साथ मुर्गीपालन अउ साग-सब्जी के उत्पादन करके उपराहा आमदनी अर्जित करत हावय। किसान मंगलदई बतात हावय के सही सलाह अउ मार्गदर्शन ले मछली पालन करके आर्थिक रुप ले सृदृढ़ होइस, जिला म विभागीय  अधिकारी मनद्वारा समय-समय म उचित सलाह दे जाथे। जेकर ले मछली के उत्पादन म बड़वार होवत हावय। मंगलदई ह बताइन के वो ह पाछु 5 साल ले सरलग रुप ले मछली पालन के बुता करत हावय। जेकर ले परिवार के आर्थिक स्थिति तको मजबूत होए हावय। बीजापुर जिला म मछली के मांग जादा हावय। 200 प्रति किलो के दर ले इहां मछली बहुत आसानी ले बिक जाथे। मिले आरो के मुताबिक सहायक संचालक मछरी विभाग बकोदिया ह बताइन के जिला के मछरी कृषक ल सही समय म उन्नत किस्म के मछली बीजहा प्रदाय करे के बुता विभाग डहर ले करे जात हावय। जेकर ले मछलीपालन ल बढ़ावा मिलही।