नगरी के दुगली वन परिक्षेत्र के चारगांव के कुआ म गिरे हाथी सुरक्षित, ऑपरेशन रेस्क्यू सफल

अंजोर.धमतरी। वनांचल नगरी के दुगली वन परिक्षेत्र के गांव चारगांव म गुरुवार रतिहा तकरीबन आठ बजे किसान रमेश नेताम के खेत के कुएं म तीन हाथी गिर गे रिहिस। ए बात के जानकारी मिलते वनमण्डलाधिकारी मयंक पाण्डेय सहित वन अमला मउका म पहुंचिस। मउका म खेत के चारों तनि लगभग 30 हाथी विचरण करत रिहिस। ओमा कोनो रकम के बेचैनी नजर नइ आत रिहिस। येकर ले अनुमान लगाये गिस के खेत के कुएं म गिरे हाथी सुरक्षित हावयं। सुरक्षा के दृष्टि ले रतिहा म ऑपरेशन रेस्क्यू नइ करे के फइसला लिस। फेर वन अमला ह दू जेसीबी, सर्च लाइट्स, रेत अउ लकड़ी के लट्ठे उक के बेवस्था करके लिस रिहिस, ताकि जरूरत पड़े म ओकर इस्तेमाल करे जाए।

ए बीच बिहनिया पांच बजे कुएं म गिरे तीन हाथी म ले दू हाथी लकठा के सोलर संयंत्र के सहारा बाहिर आगे। तीसरा हाथी नइ निकल पात रिहिस। येकर खातिर वन अमला ह जेसीबी ले कुएं के एक छोर ल हटाइस, ताकि वो ह हाथी वो छोर ले निकल सके। थोकन देर म हाथी निकल आइस। ए ऑपरेशन के नतीजा काफी संतोषजनक रिहिन। अब तीनों हाथी जंगल के भीतर सुरक्षित अउ स्वस्थ हावयं।