विश्व मात्स्यिकी दिवस : राज्य स्तरीय मछुआ सम्मेलन म पहुंचिस मुख्यमंत्री भूपेश बघेल, नवा रायपुर के चौराह के नाम मछुआरा समाज के महापुरूष के नाम म होही

मुख्यमंत्री भूपेश बघेल

अंजोर.रायपुर। मुख्यमंत्री भूपेश बघेल ह किहिन हावय के मछुआरा समाज के भूमिका जुन्ना काल ले आज तक सदैव गौरवपूर्ण रेहे हावय। हमर सरकार ह नवा रायपुर म प्रमुख चौक के नामकरण मछुआरा समाज के गौरव के बढ़ाये के खातिर उंकर महापुरूष के नाम म करे के फइसला ले हावय। ओमन किहिन के हमन मछली पालन के कृषि के दर्जा दे हावय। ए फैसला ले मछुआरा भाई ले जीरो परतिसत ओला करजा अउ आन सुविधा मिलत हावयं, मछुआ समाज के मंशा के मुताबिक नवा मछुआ नीति तइयार करे गे हावय, जेकर घोसना कर गे हावय। बघेल आज पंडिल दीनदयाल उपाध्याय ऑडिटोरियम म विश्व मात्स्यिकी दिवस म आयोजित कार्यक्रम ल सम्बोधित करत रिहिस।

मुख्यमंत्री बघेल ह कार्यक्रम ल सम्बोधित करत किहिन के राज्य जेन रकम ले मछली पानी के बिना नइ रह सकत हे उही रकम ले निषाद समाज मछली के बिना नइ रही सकत, इही ल धियान म रखत हमन नवा मछुआ नीति बनायेन। संग ही नरवा योजना के तहत हजारो तरिया के बनाये हावन अउ नाला के रिचार्ज करेन, जेकर ले भूमिगत जल के स्तर म बढ़ोतरी होए हावय। दस हजार ले जादा गौठान ल बनायेन, जिहां कुकरी पालन अउ मछली पालन तको होवत हाबे। ओमन किहिन के निषाद समाज सामाजिक अउ आर्थिक रूप ले सशक्त हो सके येकर खातिर राज्य सरकार सरलग प्रयासरत हावय। ओमन मछुआरा समाज ले अपील करत होइस किहिन के मछुआरा समाज तको दू कदम आगू बढ़ाए अउ शासन के योजना के लाभ लें। 

कृषि अउ मछली पालन मंत्री रविंद्र चौबे ह किहिन के हमर सरकार गांव, गरीब, किसान अउ मजदूर सबो वर्ग के सामाजिक अउ आर्थिक विकास के खातिर सरलग प्रयासरत हावय। राज्य सरकार डहर ले मछुआ समाज के कल्याण के योजना बनाये गे हावय। हमर सरकार ह बिलासपुर विमानतल के नामकरण बिलासा महतारी के नाम म करिन हावय, जेन एक एतिहासिक फइसला हावय। ओमन किहिन के निषाद समाज के मंशा के मुताबिक नवा रायपुर के कोनो एक प्रमुख चौक के नाम शिरोमणि भगत गुहा निषाद के नाम म करे के फइसला ले लिस गे हावय। भविष्य म उंकर मूर्ति तको लगाये जाही, ए संबंध म ओमन मछुआरा समाज ले मूर्ति के स्वरूप अउ कार्यक्रम के रूपरेखा तइयार करके शासन के प्रस्ताव दे के गेलौली करिन। 

कार्यक्रम म मछुआरा समाज के मछली पालन ले जुड़े 31 हितग्राही मन के मोटर साइकिल सह आइस-बाक्स अउ 7 हितग्रहियों के चार पहियां वाहन के बाटे तको करे गिस। कार्यक्रम म संसदीव सचिव कुंवरसिंह निषाद, मछुआ कल्याण बोर्ड के अध्यक्ष एम.आर निषाद अउ आन सदस्य दिनेश फुटान, देवकुमार निषाद, नरेश निषाद अउ मछली पालन विभाग के अधिकारी कर्मचारी अउ राज्य के आने-आने जिला  ले आए निषाद समाज के प्रतिनिधि बड़े संख्या म उपस्थित रिहिस।