गिरदावरी पोर्टल म रकबा सुधार लऊहे करे के निर्देश दिस कलेक्टर

अंजोर.राजनांदगांव। कलेक्टर डोमन सिंह ह मुख्यमंत्री भूपेश बघेल के भेंट-मुलाकात कार्यक्रम ल देखत  अधिकारी मनला मुस्तैदी ले बुता करे के निर्देश दिस। ओमन किहिन के कार्यक्रम के खातिर पूरा तइयारी रिही। ऑनलाईन नामांतरण के संबंध म किहिन के नामांतरण प्रक्रिया के सरलीकरण करे गे हावय। जेकर ले अविवादित नामांतरण अउ खाता विभाजन के प्रकरण के तुरते अउ समयबद्ध निराकरण के खातिर ऑनलाईन नामांतरण करे हावय। गांव पंचायत स्तर म येकर खातिर पंचायत सचिव ल प्रशिक्षण दे के जरूरत हावय। ओमन रूरल इंडस्ट्रियल पार्क अउ गोधन न्याय योजना के जानकारी लिस।

कलेक्टर ह किहिन के शहरी अउ ग्रामीण क्षेत्र म कांजी हाऊस बनाये के बुता प्राथमिकता ले करे जाना हावय। किसान पंजीयन के बुता जारी हावय। गिरदावरी पोर्टल खुला होइस हावय। एमे रकबे ले संबंधित सुधार के बुता युद्ध स्तर म करे के निर्देश दिस। ओमन किहिन के समिति प्रबंधक हड़ताल ले वापसी के संबंध म जानकारी लिस। ओमन चिटफंड कंपनी म निवेशक के भुगतान के संबंध म जानकारी लिस। ये बात ओमन साप्ताहिक समय-सीमा के बइठक म कहिन।

कलेक्टर सिंह ह जर्जर सड़क मरम्मत के जानकारी लेवत होइस किहिन के ये बुता प्राथमिकता ले करे हावय। ओमन खेल विभाग के युवा महोत्सव के आयोजन के तइयारी करे के निर्देश दिस। ओमन मुख्यमंत्री सुपोषण अभियान, सी-मार्ट, धन्वंतरी जेनेरिक मेडिकल स्टोर, कृष्ण कुंज, राजीव गांधी ग्रामीण भूमिहीन कृषि मजदूर न्याय योजना, जल जिनगी मिशन, ऑनलाइन कोचिंग के स्थिति के समीक्षा करिस। फसल कटाई प्रयोग, आयुष्मान कार्ड, मुख्यमंत्री हाट बाजार क्लीनिक योजना, स्वामी आत्मानंद स्कूल के प्रगति, नगरीय क्षेत्र म 7500 वर्गफुट अतिक्रमित भूमि के व्यवस्थापन, जर्जर आंगनबाड़ी भवन के जानकारी लिस। ए मउका म जिला पंचायत सीईओ अमित कुमार, अपर कलेक्टर सीएल मारकण्डेय, नगर निगम आयुक्त डॉ. आशुतोष चतुर्वेदी, समिलहा कलेक्टर श्रीमती इंदिरा देवहारी, समिलहा कलेक्टर खेमलाल वर्मा, एसडीएम अरूण वर्मा सहित आन जिला स्तरीय अधिकारी उपस्थित रिहिस।