मुख्यमंत्री भूपेश बघेल ह खारून नदी महादेव घाट म कातिक पुन्नी नहाके हटकेश्वर महोदव के करिस पूजा

अंजोर.रायपुर। मुख्यमंत्री भूपेश बघेल ह कातिक पुन्नी के मउका म बिहनिया रायपुर के महादेव घाट पहुंच के खारून नदी म कातिक पूर्णिमा स्नान करके प्रदेसवासी के सुख-समृद्धि के कामना करिस। मुख्यमंत्री ह ए मउका म सबो प्रदेसवासी के कातिक पुन्नी मेला के बधाई अउ सुभकामना दीस।

ए मउका म ओमन किहिन के हमर इहां धार्मिक, सांस्कृतिक अउ सामाजिक परंपरा के निर्वहन करे जाथे। पुन्नी मेला के मउका म आज इहां आसपास के सबो गांव के लोगन आथे।  पुन्नी मेला हमर जुन्ना परंपरा हावय, हमर छत्तीसगढ़ के गांव, शहर के परंपरा के हिस्सा हावय। कातिक महीना म बिहनिया के स्नान अउ शिवजी म जल चढ़ाये के परंपरा रेहे हावय, आज ले गांव के घाट म मेला के आयोजन सुरू हो जाथे। ओमन किहिन के आज प्रकाश परब के शुभ दिन तको हावय, गुरुनानक जी के जयंती हावय, जेकर छत्तीसगढ़ ले जुन्ना नाता रिहिन हावय, उंकर जुड़ाव के जगह महासमुंद जिला के गढ़फुलझर के हमन पर्यटन जगह के रूप म तको विकसित करे के फइसला ले हावन।

ए मउका म संसदीय सचिव विकास उपाध्याय, गौ सेवा आयोग के अध्यक्ष महंत राम सुंदर दास, मुख्यमंत्री के सलाहकार प्रदीप शर्मा, रायपुर नगर निगम के महापौर एजाज ढेबर सहित आन जनप्रतिनिधिगण अउ बड़का संख्या म दरस करइयागण उपस्थित रिहिस।