विश्व धरोहर सप्ताह 19 ले 25 नवंबर तक होही चित्र प्रदर्शनी, प्रश्नोत्तरी सहित कई आयोजन

अंजोर.रायपुर। संस्कृति अउ पुरातत्व विभाग डहर ले विश्व धरोहर सप्ताह म अभिलेख के चित्र प्रदर्शनी अउ प्रश्नोत्तरी सहित कई कार्यक्रम के आयोजन करे जाही। विश्व धरोहर सप्ताह 19 ले 25 नवंबर 2022 तक मनाये जात हावय। ए बखत विभाग डहर ले अपन विरासत के प्रति जनजागरूकता के प्रसार अउ धरोहर के प्रति जनसामान्य के उत्तरदायित्व अउ कर्तव्य के बोध कराये बर विविध कार्यक्रम होही।

संस्कृति विभाग के  अधिकारी मन बताइन के 19 नवंबर के बिहनिया 11 बजे महंत घासीदास स्मारक संग्रहालय आर्ट गैलरी म शैलचित्र अउ अभिलेखागार के ऐतिहासिक अभिलेख के चित्र प्रदर्शनी लगाये जाही।  वरिष्ठ पुराविद् पद्मश्री ए.के. शर्मा अउ संचालक विवेक आचार्य प्रदर्शनी ल सुरू करही। प्रदर्शनी के अवलोकन पूरा सप्ताह तक कार्यालयीन दिन अउ समय म करे जा सकही।

अधिकारी मन बताइन के विश्व धरोहर सप्ताह के ए कड़ी म 21 नवंबर के बिहनिया 11 बजे कक्षा 6वीं ले 12वीं तक के पढ़इया लइका बर लिखित प्रश्नोत्तरी प्रतियोगिता, 22 अउ 23 नवंबर के 11 बजे ले 6वीं ले 8वीं अउ 9वीं ले 12वीं कक्षा के पढ़इया लइका बर चित्रकला प्रतियोगिता रखे गे हावय। 24 नवंबर के मंझनिया 3 बजे ले पुरातत्त्व विभाग डहर ले कराइन गे ग्रामवार सर्वेक्षण के पावर प्वाईंट प्रस्तुति होही। आखरी दिन 25 नवंबर के मंझनिया 2 बजे प्रतियोगिता के परिणाम घोसित करे जाही अउ प्रथम, दूसरइया अउ तीसरा ठऊर  मिले करे वाला पढ़ईया मन के आकर्षक पुरस्कार अउ सबो पढ़ईया मन के प्रमाणपत्र बांटे जाही। ए मउका म धरोहर म केन्द्रित विशेषज्ञ के व्याख्यान तको होही। विश्व धरोहर सप्ताह के बखत (सोमवार के छोड़कर) स्कूली पढ़ईया मन ल फोकट म संग्रहालय दरसन के सुविधा रइही।