 |
| ‘बेटा’ छत्तीसगढ़ी फिल्म के फस्ट लूक लांच, आरंग अंचल म चलत हाबे शूटिंग |
अंजोर.सिनेमा। चकोर फिल्मस के एक अऊ नवा छत्तीसगढ़ी फिल्म ‘बेटा’ के फस्ट लूक लांच होगे हावय। बेटा छत्तीसगढ़ के खास परंपरा अउ संस्कृति ल उजागर करत बनाये जात हवय, जइसे के निर्माता / निर्देशक चंद्रशेखर चकोर के हरेक फिल्म म होथे। कुछ बछर पहिली प्रदेश म छत्तीसगढ़ी भासा ल कामकाज म बउरे अउ निजी स्कूल के संग शासकीय स्कूल के पढ़ई ल रेखांकित करत ‘चक्कर गुरूजी के’ बनाये गे रिहिस। ओकर अऊ पहिली ‘गुरावंट’ फिल्म आये रिहिस, जेन ल लोगन मन बहुत मया दुलार दिस। ‘गुरावंट’ छत्तीसगढ़ी के लोक जीवन म बिहाव संस्कार ल लेके बनाये गे रिहिस, जेन म लड़की अउ लड़का वाले मन एक दूसर घर अदला-बदली करके अपन बेटी-बेटा के बिहाव एक-दूसर संग कराथे।
अब आरो मिले हावय के चकोर फिल्मस के बैनर तले छत्तीसगढ़ी फिल्म ‘बेटा’ के शूटिंग रायपुर जिला के आरंग विकासखंड के गांव मन म चलत हाबे। संगे-संग सोशल मीडिया म फिल्म के फस्ट लूक लांच करे गे हावय। पोस्टर के रूप म जारी फस्ट लूक म निर्माता / निर्देशक /चंद्रशेखर चकोर जबरदस्त अदाकारी देखावत आरूग लोक रंग म रंगे दिखत हाबे। जेन मन छॉलीवुड म आरूग छत्तीसगढ़ी ल देखे के आस धरे टाकीज आथे ओमन ल चकोर फिल्मस के अगोरा रिथे। ए फिल्म का खास हावय ये बात पाछू बताबो बहरहाल पोस्टर ले कहानी के आकब करत राहव।
- Movie - Beta
- Production - Chakor Films
- Producer/Director – Chandrashekhar Chakor
- Artists- Chandrashekhar Chakor, Shalini Vishwakarma, Lekha, Shiv Chandrakar, Ghanshyam Verma, Sudama Sharma, Meena etc.
- Language- Chhattisgarhi
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।