सीएम साहब नहीं अपन ‘कका’ ले होथे भेंट-मुलाकात, सरल अउ सहज भाव ले सुनथे सबो के गोठ अउ खिचाथे फोटो

‘कका’ ले भेंट-मुलाकात

अंजोर.बेमेतरा। देस म अब छत्तीसगढि़या मुख्यमंत्री दाऊ भूपेश बघेल के नाव के गजब सोर उड़त हाबे। लोगन मन उनला सीएम साहब नहीं ‘कका’ कहिके गोठबात करथे। अऊ सीएम साहब तको सरल अउ सहज भाव ले लोगन के समस्या सुनथे। कका के ये सुभाव ले देस के सबसे जादा लोकप्रिय मुखिया के रूप म उंकर नाव अव्वल आवथे। नाम के संग उंकर काम तको बोलथे। आन प्रदेस म छत्तीसगढ़ के योजना मनके चारी के संग जबर बढ़ई होथे। कतकोन योजना मनला आन-आन राज के सरकार मन तको अपन कोति ले लागू करे के खातिर गुनान करत हाबे।

एसो के भेंट-मुलाकात म दाऊ जी ह पाछू बखत के करे घोसना मनके काम ल देखत हावय। जेन कोति ले बने बुता के आरो नइ आवे ओति अधिकारी मनला फटकार तको लगाथे। इही सेती इहां के जनता खुशहाल हावय। लोगन मन सीएम साहब ले गोठबात के संग कका-कका कइके फोटो खिचाये बर आगू आथे अऊ कका तको सबो के संग हांसी-ठीठोली ले फोटो खिचाथे।