ममता चंद्राकर जी के जनमदिन म खास फोटो शेयर करिस फिल्ममेकर प्रेम चंद्राकर..., देखव लुगरा के अंचरा छपे हावय राजगीत

अंजोर.ए। छत्तीसगढ़ी लोकगीत ल नवा चिन्हारी देवइया स्वर कोकिला ममता चंद्राकर जी के आज 3 दिसंबर जनमदिन हावय। कला-संस्कृति के दुनिया म ममता चंद्राकर केवल नाम ही काफी हाबे।नानपन ले संगीत के साधना म लीन कई लोकगीत ल अपन स्वर ले सजाइस। आकाशवाणी के केन्द्र निदेशक जइसे प्रशासनिक जिम्मेदारी ल निभावत, अब ओमन इंदिरा कला संगीत विश्वविद्यालय के कुलपति तक के पदवी तक ल सुशोभित करे हावय। छत्तीसगढ़ राज्य अलंकरण म मंदराजी सम्मान, भारत सरकार कोति ले पद्मश्री अउ संगीत नाटक अकादमी पुरस्कार उंकर कला के कद कइथे।

आज जनमदिन के मउका म श्रीमती ममता चंद्राकर जी के जेन फोटो प्रेम चंद्राकर जी शेयर करे हाबे, वहू बहुतेच खास हाबे। टेहर्रा रंग के लुगरा म छत्तीसगढ़ के राजगीत... अरपा पइरी के धार छपे हावय। जानबा होवय के अरपा पइरी के धार श्री नरेन्द्र देव वर्मा जी के रचना आए, मंच म श्रीमती ममता चंद्राकर जी ये गीत ल गावय।