आयुष्मान कारड म इलाज के खरचा म गड़बड़ी, पांच अस्पताल के खिलाफ निलंबन अउ अर्थदण्ड के कार्रवाई

अंजोर.रायपुर। आयुष्मान भारत प्रधानमंत्री जन आरोग्य योजना डॉ. खूबचंद बघेल स्वास्थ्य सहायता योजना ले पंजीकृत अस्पताल के ऑनलाइन सिस्टम के माध्यम ले इलाज ले कराये मरीज मन के ऑडिट करे जाथे। ऑडिट के बखत पाछु दिन कुछ अनुबंधित निजी अस्पताल म गड़बड़ी पाई गे रिहिस। स्वास्थ्य विभाग डहर ले रायपुर अउ बिलासपुर के अइसे पांच अस्पताल के खिलाफ निलंबन अउ अर्थदण्ड के कार्रवाई करे गे हावय।

संचालक, स्वास्थ्य सेवा-सह-मुख्य कार्यपालन अधिकारी आयुष्मान भारत प्रधानमंत्री जन आरोग्य योजना डॉ. खूबचंद बघेल स्वास्थ्य सहायता योजना राज्य नोडल एजेंसी, रायपुर के डहर ले ऑडिट म गड़बड़ी पाए जाये वाला अस्पताल म कार्रवाई के आदेश जारी करे  गे हावयं। नवापारा रायपुर के अंजलि नर्सिंग होम, माहेर हॉस्पिटल अउ शाह नर्सिंग होम, बिलासपुर के श्रीबालाजी हॉस्पिटल अउ रायपुर के रामकृष्ण केयर हॉस्पिटल के विरूद्ध कार्रवाई करे गे हावय।

स्वास्थ्य विभाग ह बिलासपुर के श्रीबालाजी हॉस्पिटल के एक साल के खातिर निलंबित करे हावय। नवापारा रायपुर के अंजलि नर्सिंग होम के खिलाफ तीन लाख रूपिया के अर्थदण्ड अउ एक साल के निलंबन, माहेर हॉस्पिटल के खिलाफ पांच लाख रूपिया के अर्थदण्ड अउ एक साल के निलंबन अउ शाह नर्सिंग होम के खिलाफ तीन लाख रूपिया के अर्थदण्ड अउ एक साल के निलंबन के कार्रवाई करे गे हावय। रायपुर के रामकृष्ण केयर हॉस्पिटल म आयुष्मान भारत प्रधानमंत्री जन आरोग्य योजना डॉ. खूबचंद बघेल स्वास्थ्य सहायता योजना के ले उपचारित मरीज मन ले उपराहा रकम के मामला म छह लाख 16 हजार 834 रूपिया के अर्थदण्ड लगाये गे हावय। संग ही उपराहा रकम संबंधित मरीज मन ल वापस देवाये गे हावय।

टोल-फ्री नंबर म कर सकत हावयं शिकायत

आयुष्मान भारत प्रधानमंत्री जन आरोग्य योजना डॉ. खूबचंद बघेल स्वास्थ्य सहायता योजना ले पंजीकृत अस्पताल म इलाज म कोनो भी रकम ले दिक्कत होए म मरीज या उंकर परिजन सोज टोल-फ्री नंबर 104 या 14555 म शिकायत कर सकत हावयं। शिकायत के आधार म तुरते कार्यवाही करे जात हावय। संग ही उपचारित मरीज मन के ऑनलाइन सॉफ्टवेयर म उपलब्ध डेटा के ऑडिट तको सरलग संबंधित डॉक्टर मन के डहर ले करे जाथे। गड़बड़ी पाए जाये म राज्य नोडल एजेंसी डहर ले बेरा-बेरा म कार्यवाही के जाथे ताकि मरीज मन के फोकट म अउ समुचित इलाज मिल सके।