बिलासपुर जिला प्रशासन के वेबसाइट ल मिलिस राष्ट्रीय प्लेटिनम अवार्ड

बिलासपुर जिला प्रशासन के वेबसाइट ल मिलिस राष्ट्रीय प्लेटिनम अवार्ड

अंजोर.रायपुर। छत्तीसगढ़ के बिलासपुर जिला प्रशासन के वेबसाइट ल नई दिल्ली म नवाचार के खातिर राष्ट्रपति श्रीमती द्रौपदी मुर्मू ह राष्ट्रीय प्लेटिनम अवार्ड ले सम्मानित करिन। विज्ञान भवन म आयोजित कार्यक्रम म बिलासपुर के जिला कलेक्टर सौरभ कुमार ह ये अवार्ड ल झोकिन।

बिलासपुर जिला प्रशासन डहर ले करे गे नवाचार ल राष्ट्रीय स्तर म सराहना मिले हावय। भारत सरकार के इलेक्ट्रॉनिक्स अउ सूचना प्रौद्योगिकी विभाग डहर ले जिला प्रशासन के वेबसाइट ल राष्ट्रीय प्लैटिनम अवार्ड दे गिस। बिलासपुर जिला प्रशासन के वेबसाइट के बेस्ट वेब एंड मोबाइल इनिशिएटिव कांम्पलांइथ विथ जीआइजीडब्ल्यू एंड एससीबिलिटी गाइडलाइन के श्रेणी ले ये पुरस्कार दे हावय।

केंद्र सरकार के फ्लैगशिप योजना डिजिटल इंडिया के क्रियान्वयन म बिलासपुर जिला के वेबसाइट ह नवाचार करे हावय। एनआईसी (राष्ट्रीय सूचना विज्ञान केंद्र) डहर ले तइयार वेबसाइट म केंद्र अउ राज्य शासन के योजना मन के जानकारी अपलोड करे के संग ही दिव्यांग के खातिर तको एमे बिसेस सुविधा दे गे हावय। दृष्टिबाधित तको साफ्टवेयर के जरिए ए वेबसाइट म दे गे सूचना ल सुन सकत हावयं। जिहां-जिहां माउस के कर्सर जाही, उहां लिखे जानकारी आवाज म बदल जाही। हालांकि अभी ये सुविधा अंग्रेजी म ही हावय। आने वाला दिन म हिंदी म तको ये सुविधा दे जाही। येकर खातिर एनआईसी के तकनीकी विशेषज्ञ ह काम करे के सुरू कर दे हावय। खास बात ये के दृष्टिबाधित के खातिर वेबसाइट म बिसेस रकम ले के साफ्टवेयर तको अपलोड करे गे हावय। येकर उपयोग मुफ्त म करे जा सकही। येकर खातिर अकताहा रकम नइ देना पड़ही। ए मउका म एनआईसी बिलासपुर के डीआईओ अरविंद यादव अउ सहायक डीआईओ मनोज कुमार सिंह तको सामिल रिहिन।