 |
| छत्तीसगढ़ लोक साहित्य सम्मेलन 2023 |
अंजोर.रायपुर। राज्य स्तरीय युवा महोत्सव म लोक साहित्य सम्मेलन के तीसरइया अउ आखरी दिन कहानी अउ कविता पाठ के आयोजन करे गिस। पहिली सत्र के अध्यक्षता वरिष्ठ साहित्यकार परदेशी राम वर्मा अउ दूसरइया सत्र के अध्यक्षता रामेश्वर वैष्णव ह करिस। ये मउका म प्रसिद्ध छत्तीसगढ़ी लेखक परमानंद वर्मा के छत्तीसगढ़ी उपन्यास ‘गोंदा’ के विमोचन करे गिस। जानबा होवय के परमानंद वर्मा छत्तीसगढ़ी के बड़का कलमकार आए ओमन पत्रकारिता करत दैनिक देशबंधु म छत्तीसगढ़ी अंक मड़ई के शुरूआत करे रिहिस। जेन आजो नवा-जुन्ना सबो कलमकार मनला मउका देवत हावय। परमानंद वर्मा के प्रमुख कृति म पुतरी-पुतरा के बिहाव, तोर सुरता, करौंदा, गजरा आदि के प्रकाशित होगे हावय।
ये जलसा म आगू छत्तीसगढ़ के प्रसिद्ध लेखिका श्रीमती सुधा वर्मा के कथा संग्रह ‘इंद्रावती के धार’ के विमोचन करे गिस। जानब होवय के श्रीमती सुधा वर्मा के संपादन म आजो मड़ई अंक प्रकाशित होवत हाबे। ओमन के कोख में बसेरा, तरिया के आंसू, दुलारी, चुरकी भुरकी, धनबाहर के छांव, गोदना के गोठ, बरवट के गोठ सहित दू दर्जन ले आगर किताब प्रकाशित हो चुके हावय। संग म सरगुजिया भाषा म दीपलता देशमुख के बाल कहनी के तको विमोचन करे गिस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।