लोकनाट्य चंदैनी म 'खोखन खल्लू्' के होइस मंचन

लोकनाट्य चंदैनी म 'खोखन खल्लू्' के होइस मंचन

अंजोर.रायपुर। छत्तीसगढ़ लोकनाट्य के चंदैनी शैली ल नंदाये बचाये खातिर गुड़ी चौरा सांस्कृतिक, साहित्यक संस्था रायपुर अउ संस्कृति विभाग छ.ग. शासन डहर ले समिलहा रूप म एक दिवसीय चंदैनी समारोह के आयोजन बोरिया खुर्द नवरंग चौक रायपुर म करे गिस। कार्यक्रम म माई पहुना के रूप वार्ड 54 के पार्षद प्रतिधिनी चंद्रहास निर्मलकर, अध्यक्षता वरिष्ठ साहित्यकार अरूण निगम अउ खास पहुना छत्तीसगढ़ी मासिक पत्रिका 'अंजोर' के संपादक जयंत साहू, सुरेश धीवर युवा समाजसेवी बोरिया खुर्द उपस्थित रिहिस।

ए मउका म संस्कृति कर्मी चंद्रशेखर चकोर ले किहिन के हमर संस्था डहर ले पाछु कई साल ले नंदाये लोक विधा ल सहेजे के बुता करत हावय। जेमा प्रमुख रूप ले बांस गीत समारोह अउ चंदैनी समारोह संस्कृति विभाग के सहयोग ले करे जाथे। संस्था डहर ले ए विधा के सरेखा खातिर वरिष्ठ कलाकार मन के प्रस्तुति के संग सम्मान तको करत हावयं, संग ही नवा  कलाकार मनला मंच तको दे के उदीम करत, नवा पीढ़ी ल ये विधा मन के बारे म जानकारी दे जात हावय।

बोरिया खुर्द के नवरंग चौक म आयोजित कार्यक्रम के माई पहुना चंद्रहास निर्मलकर ह अपन उद्बोधन म किहिन के हमन अपन गांव म पहिली चंदैनी देखे रिहिस, अबतो शहर के संग गांव म अइसे प्रस्तुति देखे ल नइ मिलत हाबे। गुड़ी चौरा संस्था डहर ले हरेक साल चंदैनी समारोह करे जात हावय जेन सराहनीय बुता हावय। ए मउका म कार्यक्रम के अध्यक्षता करत वरिष्ठ साहित्यकार अरूण निगम ह किहिन के छत्तीसगढ़ अपन विशिष्ट लोक कला अउ साहित्य के खातिर देश-विदेश म आन पहचान रखत हावय। पंथी अउ पंडवानी ह त वैश्विक स्तर म प्रसिद्धी पाये हावय फेर उहें लोक नाट्य के दूसर विधा चंदैनी आज देखे ल नइ मिलत हावय। अइसे आयोजन प्रदेस भर म होना चाही।

कार्यक्रम म पहुना उद्बोधन के बाद सम्मान समारोह के आयोजन करे गिस जेमा बोरिया खुर्द के वरिष्ठ तबला वादक जगत यादव अउ बेंजो वादक प्रकाश जलक्षत्रि के संस्था के तनि ले पहुना मनके हाथ ले सम्मान होइस। ए मउका म वरिष्ठ कलाकार सुदामा शर्मा, शिव चंद्रकार, गोविंद धनगर, घनश्याम वर्मा, उत्तम ठाकुर, चैनसिंग साहू, प्रभा ध्रुव, मीना विश्वकर्मा, यतीश बंछोर, परमेश्वर कोसे, जितेंद्र सहित केऊ कलाकार अऊ सुजानी सियानमन जुरियाए रिहिस।