जूटमिल थाना के एसएसपी अभिषेक मीना ह करिन विधिवत उद्धघाटन

जूटमिल थाना के एसएसपी अभिषेक मीना ह करिन विधिवत उद्धघाटन

अंजोर.रायगढ़। थाना सिटी कोतवाली के चौकी जूटमिल उन्नयन होके जिला के नया पुलिस थाना बने हावय। येकर बने ले जिला म थाना अजाक अउ ट्रैफिक सहित अब थाना के संख्या 16 होगे। जिला म अब 16 थाना के संग 3 पुलिस चौकी- चौकी रैरूमाखुर्द, चौकी खरसिया अउ चौकी जोबी हावयं। वरिष्ठ पुलिस अधीक्षक अभिषेक मीना ह नवा  पुलिस थाना जूटमिल के फीता काटके, पूजा अर्जन करके विधिवत उद्घाटन करिस। जूटमिल के जवान मन डहर ले वरिष्ठ पुलिस अधीक्षक ल सलामी दीस। ए बखत एसएसपी मीना थाना के रोजनामचा म कार्यवाही संचालन के पहिली रोचनामचा रिपोर्ट अपन हाथ ले लेख करे गिस। ए थाना म प्रस्तावित तहत 32 गांव/वार्डों ल सामिल करे गे हावय।

वरिष्ठ पुलिस अधीक्षक मीना बताइन के थाना कोतवाली म दर्ज एक तिहाई ले जादा अपराध जूटमिल ले संबंधित होवत रिहिस, पाछु साल थाना कोतवाली म 1794 अपराध दर्ज करे गे रिहिस जेला देखत जिला पुलिस कवायद चले रिहिस के पुलिस चौकी जूटमिल के थाना बनाये जाए। जेकर खातिर राज्य शासन के प्रस्ताव भेजे गे रिहिस। अऊ गृह विभाग (पुलिस) छत्तीसगढ़ ले 9 जनवरी 2023 के प्रस्ताव ल हरी झंडी मिले हावय अउ आज पुलिस थाना के विधिवत उद्घाटन करे गिस। नवा थाना बने ले इहां के लोगन ल बड़का सहूलियत अउ सुविधा मिलही। नवा  थाना म अब एफआईआर, सीसीटीएनएस बुता सुचारू रूप ले संचालित होही। दर्ज अपराध, शिकायत के जांच इहें ले होही।

जल्दीस ही जूटमिल थाना ल अउ जादा बल अउ संसाधन उपलब्ध कराये जाही। संसाधन अउ बल उपलब्ध होए ले असामाजिक तत्व म कसावट लाने जाही अउ अपराध म कमी आही। थाना मुताबिक स्टाफ बढ़े ले क्राईम म पुलिस अउ प्रभावी रूप ले कार्रवाई करही। कम्प्यूटर अउ सीसी कैमरे ले लैस थाना जूटमिल म आज ले एफआईआर उक बुता सुरू हो जाही। नवा थाना म पहिली थानाध्यक्ष के रूप म उपनिरीक्षक कमल किशोर पटेल सहित 54 पुलिसकर्मी तैनात हावय।

थाना के उद्धघाटन मउका म अकताहा पुलिस अधीक्षक संजय महादेवा, पुलिस अनुविभागीय अधिकारी खरसिया श्रीमती निमिषा पाण्डेय, पुलिस अनुविभागीय अधिकारी धरमजयगढ़ दीपक मिश्रा, डीएसपी निकिता तिवारी, सीएसपी अभिनव उपाध्याय, रक्षित निरीक्षक अमरजीत खुंटे, शहर के सबो थाना प्रभारी सहित जिला के पुलिस अधिकारी मौजूद रिहिस।