प्रधानमंत्री नरेंद्र मोदी ह रायगढ़ के मिलेट कैफे ल सहराइन, कैफे म मिलत हावय रागी ले बने चीला अउ कोदो के बिरयानी

अंजोर.रायगढ़। रायगढ़ के नटवर स्कूल के तिर एक मिलेट कैफे चलत हावय। वइसे तो येमा केऊ खूबी हावय, अनूठा कैफे हावय। ए कैफे म रागी, कोदो, कुटकी जइसे मोटा अनाज ले बने सुघ्घ्र खजेना परोसे जात हावयं। जेमा सुवाद के संग सेहत के जुगलबंदी होवत हावय। ए कैफे ल प्रदेस के पहिली मिलेट कैफे होए के गौरव हासिल हावय, जेकर संचालन के जिम्मा पूरा रकम ले महिला मन के हाथ म हावय। आज येकर पहचान म एक नवा खासियत जुड़गे हावय। प्रधानमंत्री नरेंद्र मोदी ह स्वयं अपन रेडियो कार्यक्रम ‘मन के बात’ कार्यक्रम म येकर जिक्र करके ए मिलेट ल बढ़ावा दे के पहल ल सहराइन। ओमन देशवासी ले किहिन के जब छत्तीसगढ़ के रायगढ़ जाये के मउका मिलही त मिलेट कैफे जाके उहां के व्यंजन के आनंद जरूर उठाएं। ए कैफे म रागी ले बने पास्ता, चीला, इडली, मंचूरियन, मोमोज, पिज्जा, नूडल, दोसा, कोदो ले बने बिरयानी के सुवाद ले जा सकत हावय।

जानबा होवय के मोटा अनाज के उत्पादन अउ उपभोग ल प्रोत्साहित करे के खातिर साल 2023 के अंतर्राष्ट्रीय मिलेट ईयर के रूप म मनाये जात हावय। जानबा होवय के मुख्यमंत्री भूपेश बघेल के अगुवई म छत्तीसगढ़ म रागी, कोदो, कुटकी जइसे मोटे अनाज अउ लघु धान्य फसल मन के पैदावार बढ़ात, येकर खरीदी के अच्छा बेवस्था सुनिश्चित करे अउ येकर प्रोसेसिंग करके एमन ल शहर के बाजार तक पहुंचाये के खातिर मिशन-मिलेट सुरू करे गे हावय। राज्य सरकार ह कोदो, कुटकी अउ रागी के समर्थन कीमत तय करे के संग राजीव गांधी किसान न्याय योजना के दायरे म एमन ल तको सामिल करे हावय। प्रदेस के 14 जिला  के ए मिशन म सामिल करे गे हावय। येकर खातिर इंडियन इंस्टिट्यूट ऑफ मिलेट रिसर्च हैदराबाद ले एमओयू करे गे हावय। एमओयू के ले इंडियन इंस्टिट्यूट ऑफ मिलेट रिसर्च हैदराबाद छत्तीसगढ़ म कोदो, कुटकी अउ रागी के उत्पादकता बढ़ाये, तकनीकी जानकारी, उच्च क्वालिटी के बीजहा के उपलब्धता अउ सीड बैंक के स्थापना के खातिर सहयोग अउ मार्गदर्शन दे रिहिन हावय।

छत्तीसगढ़ म कोदो, कुटकी, रागी के समर्थन कीमत म करे जाथे खरीदी

जानबा होवय के छत्तीसगढ़ देश के पहिली राज्य हावय, जिहां मुख्यमंत्री भूपेश बघेल के अगुवई म मिलेट्स ल सरलग बढ़ावा दे जात हावय। छत्तीसगढ़ म कोदो, कुटकी अउ रागी के न सिरिफ समर्थन कीमत घोसित करे गिस बल्कि समर्थन कीमत म खरीदी तको करे जात हावय। ए पहल ले छत्तीसगढ़ म मिलेट्स के रकबा डेढ़ गुना बढ़े हावय अउ उत्पादन तको बढ़े हावय। मुख्यमंत्री के पहल म छत्तीसगढ़ विधानसभा म विधायक अउ मीडिया के खातिर मिलेट्स ले बने व्यंजन ल बढ़ावा दे के खातिर मंझनिया भोज के तको आयोजन करे जा चुके हावय। छत्तीसगढ़ म मिलेट कैफे तको सुरू हो चुके हावय। छत्तीसगढ़ के कांकेर जिला के नथिया-नवागांव म मिलेट्स के सबले बड़े प्रोसेसिंग प्लांट तको स्थापित करे जा चुके हावय। मिलेट्स ल बढ़ावा दे के खातिर गउठान म विकसित करे  जात रूरल इंडस्ट्रियल पार्क म मिलेट्स प्रोसेसिंग प्लांट लगाए जात हावयं।

गजब जुन्ना खानपान के फेर ले मिलत हावय बढ़ावा

कई पीढी ले रागी, कोदो जइसे अनाज हमर आहार के प्रमुख हिस्सा रिहिस। फेर आज इंकर उपयोग सीमित होगे हावय। ये अनाज सेहत के खातिर जरूरी बहुत से पोषक तत्व ले भरे होवत हावयं। ए कैफे ले लोगन ल ये अनाज ले तइयार व्यंजन के रूप म सेहतमंद विकल्प मिलेंगे। ए मिलेट कैफे के शुरुआत मई 2022 म करे गे हावय।

मिलेट कैफे ले महिला उद्यमिता मनला मिलत हावय बढ़ावा

ए कैफे के शुरुआत जिला प्रशासन के पहल अउ सहयोग ले होइस हावय। येकर संचालन विकास संघ महिला समूह डहर ले करे जात हावय। एमे तकनीकी सहयोग महिला बाल विकास विभाग अउ ट्रांसफॉर्मिंग रूरल इंडिया फाउंडेशन डहर ले दे जात हावय। छत्तीसगढ़ म पहिली बार महिला स्वरोजगार अउ उद्यमिता ल बढ़ावा दे के खातिर महिला समूह के खातिर मिलेट्स आधारित कैफे के शुरुआत करे गे हावय।