अंजोर.रायगढ़। शहर म होवत बाइक चोरी म अंकुश लगाये खातिर साइबर सेल के टीम जिला के अइसे आरोपी अउ संदिग्ध मनके सूची तइयार करके अपन स्टाफ अउ मुखबिर लगाके निगाह रखे रिहिन। इही बीच कयाघाट जूटमिल म रहइया मोहम्मद रजाऊ ल मुखबिर सूचना म साइबर सेल अउ जूटमिल के पुलिस टीम ह चोरी के एक बाइक बेचे के फिराक म ट्रांसपोर्टनगर के पास पकड़ीस। मोहम्मद रजाऊ पहिली म तको चोरी मामला म चालान होए हावय। रजाऊ ले अऊ पूछताछ करे गिस जेमा ओमन बताइन के उंकर गिरोह म कुल 9 लड़का जेमा- जूटमिल के 5 लड़का, ओड़िशा के 1 लड़का अउ किरोड़ीमलनगर के 3 लड़का के संग मिलके पाछु एक डेढ़ महीना ले रायगढ़, सक्ती, जांजगीर अउ ओडिशा क्षेत्र म बाइक के चोरी करना बताइन अउ चोरी के बाइक ल सबो लड़का एक-एक करके सस्ता दाम म बेचके खपात रिहिन, जेकर तस्दीकी करे जाथे।
आरोपी बताइन के पाछु साल अगस्त महीना म मालखरौदा ले एक क्विड कार चोरी करे जेला कई महीना तक घर म छुपा करके रखे रिहिस। चोरी के क्विड कार ल सिमडेगा, झारखंड म सौदा तय होए म उंकर गिरोह के संगी अजय जांगड़े अउ अजय एक्का कार के चलात सिमडेगा लेके गे हावयं। तुरते वरिष्ठ पुलिस अधीक्षक के निर्देशन म साइबर सेल के टीम आरोपी अजय जांगड़े अउ अजय एक्का के पतासाजी करे खातिर काली रतिहा रवाना होइस जेला झारखंड म ट्रैक करके हिरासत म लेके चोरी के क्विड कार के संग रायगढ़ लाने गे हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।