पद्मश्री 2023 सम्मान खातिर चयनित छत्तीसगढ़ के विभूति मनला बधाई दीस मुख्यमंत्री भूपेश बघेल

पद्मश्री 2023 सम्मान

अंजोर.रायपुर। मुख्यमंत्री भूपेश बघेल ह पद्मश्री सम्मान के खातिर चयनित छत्तीसगढ़ के विभूति अजय कुमार मंडावी अउ डोमर सिंह कंवर ल फोन म बधाई अउ सुभकामना दीस। ओमन देश के प्रतिष्ठित पुरस्कार के खातिर चयनित होए म खुशी जाहिर करत किहिन के येकर ले छत्तीसगढ़ के कला जगत सहित पूरा प्रदेस गौरवान्वित होइस।

जानबा होवय के राज्य गठन के बाद ये पहिली मउका हावय जब कोनो एक साल म राज्य ले तीन हस्ती मनला पद्म सम्मान के खातिर चयनित करे गे हावय। साल 2023 के खातिर चुनी गें तीन हस्ती म दू आदिवासी समाज ले हावयं।

एमे डोमर सिंह कंवर ल नाचा कला के क्षेत्र म उल्लेखनीय योगदान के खातिर पद्मश्री दे जाही। डोमर सिंह कंवर ह सामाजिक क्षेत्र म तको उल्लेखनीय काम करे हावय। ओमन बाल बिहाव जइसे केऊ कुप्रथा रुकवाये म मदद करे हावय। कला के क्षेत्र म जाये माने नाम डोमर सिंह ह देश के आने-आने हिस्सा म 5000 ले जादा प्रस्तुति दे हावय। 

उहें अजय कुमार मंडावी के कलाकृति के बेजोड़ नमूना तइयार करे के खातिर पद्मश्री सम्मान ले नवाजा जाही। लकड़ी म कला के शानदार नमूना उकेरइया मंडावी कांकेर के रहइया हावयं। दुर्ग के सुश्री उषा बारले के पंडवानी गायन के क्षेत्र म पद्म पुरस्कार ले सम्मानित करे जाही। ओमन पंडवानी के प्रशिक्षण प्रख्यात पंडवानी गायिका अउ पद्मविभूषण तीजन बाई ले पाये हावय। सुश्री बारले लन्दन अउ न्यूयॉर्क जइसे शहर म पंडवानी के प्रस्तुति दे हावय।