 |
| मुगलकालीन चांदी के 65 सिक्का मिलिस राजनांदगांव जिला के बाजार-नवागांव म |
अंजोर.राजनांदगांव। राजनांदगांव जिला के डोंगरगांव विकासखंड ले गांव बाजार-नवागांव (ग्राम पंचायत बडगांव-चारभाठा) म नल पाईपलाइन खुदाई के बखत मुगलकाल के 65 चांदी के सिक्का मिले हावयं। पुरावशेष विशेषज्ञ के मुताबिक मुगलकालीन ये सिक्का लगभग 1700-1800 ई. के बताए जात हावयं। येकर अलावा खुदाई के बखत मिश्रित धातु के 3 बाघनखनुमा अंगुठी अउ मिश्रित धातु के 2 कड़ा तको मिले हावयं।
जानबा होवय के जिला प्रशासन के तत्वावधान म नल जल योजना के तहत गांव बाजार नवागांव म पाइपलाइन बिछावत बखत 65 रजत (चांदी) के सिक्का सहित आन पुरावशेष एक मटका ले मिलिस। डोंगरगांव के अनुविभागीय अधिकारी सुनिसल नायक ह बताइन के विवेक आचार्य संचालक पुरातत्त्व, अभिलेखागार अउ संग्रहालय रायपुर के निर्देशन म विभागीय दल जेमा डॉ. प्रताप चन्द पारख उप-संचालक, डॉ. वृषोत्तम साहू उत्खनन सहायक अउ डॉ. राजीव मिंज अउ डोंगरगांव के अनुविभागीय अधिकारी डहर ले डोंगरगांव थाना प्रभारी बरेठ के पास जमा पुरावशेष अउ पाये जगह के निरीक्षण करे गिस। पुरावशेष के सुरक्षा ल धियान म रखत, महंत घासीदास स्मारक संग्रहालय रायपुर म संग्रह बर कार्यवाही करे जात हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।