राजिम म माघी पुन्नी मेला 5 ले 18 फरवरी तक

अंजोर.रायपुर। छत्ती सगढ़ के प्रयागराज कहे जाये वाला राजिम त्रिवेणी संगम म अवइया 05 फरवरी ले 18 फरवरी तक माघी पुन्नी मेला के आयोजन ल लेके धमतरी कलेक्टर ऋतुराज रघुवंशी ह मेला जगह के निरीक्षण करिन अउ तइयारी ल लेके संबंधित विभाग के  अधिकारी मनला जरूरी निर्देश दिस। ए बखत ओमन राजीवलोचन मंदिर, कुलेश्वर महादेव मंदिर, लक्ष्मण झूला अउ लोमश ऋषि आश्रम के मउका मुआयना करिन। ए मउका म उंकर संग गरियाबंद जिला के कलेक्टर प्रभात मलिक तको रिहिस।

अधिकारी मनहा मंझनिया 12.00 बजे महानदी, पैरी अउ सोंढूर नदी के संगम जगह म हर साल आयोजित होए वाला माघी पुन्नी मेला जगह के सघन निरीक्षण करिन। ए बखत कलेक्टर ह कुलेश्वर महादेव मंदिर ले नदी के किनारे मुख्य मंच तक के सड़क के चौड़ा करे बर कार्यपालन अभियंता लोक निर्माण विभाग ल दिस। संग ही आयोजन ले पहिली सबो पहुंच रसता के साफ-सफाई कराये, पर्याप्त बिजली, लाइटिंग, बायो टॉयलेट, पेयजल के उपलब्धता उक सुनिश्चित करे के तको निर्देश दिस। येकर अलावा साधु-संत समागम जगह म बनाए जाये वाला डोम तक अप्रोच रोड बनाये के निर्देश संबंधित अधिकारी ल दिस। तदोपरांत ओमन लोमश ऋषि आश्रम के अवलोकन अउ निरीक्षण करिन।

ए बखत आश्रम के पुजारी ह आश्रम म हवन सामान अउ भंडारा म भोजन पकाये बर लकड़ी के मांग करिस, जेन म कलेक्टर ह जरूरी अउ उपयोगी सामान के बेवस्था सुनिश्चित कराये खातिर अपर कलेक्टर चंद्रकांत कौशिक के निर्देशित करिन। येकर अलावा कलेक्टर ह आश्रम परिसर म पर्याप्त रौशनी के खातिर सोलर पैनल के प्रस्ताव तइयार करके प्रस्तुत करे के तको निर्देश दिस। ए मउका म अनुविभागीय अधिकारी राजस्व कुरूद सोनाल डेविड सहित धमतरी अउ गरियाबंद जिला के अधिकारीगण मौजूद रिहिस।