अंतरराष्ट्रीय क्रिकेट मैच रायपुर खातिर 12 तारीख़ ले मिलही टिकट

अंजोर.रायपुर।  नवा रायपुर के शहीद वीर नारायण सिंह स्टेडीयम म होवइया पहिली अंतरराष्ट्रीय क्रिकेट मैच के खातिर टिकट के बिक्री 12 जनवरी ले ऑनलाइन सुरू हो जाही। भारत न्यूजीलेंड के बीच होवइया ए क्रिकेट मैच के तैयारी पूरा तेजी ले करे जात हावय। आज स्टेडियम म छतीसगढ़ क्रिकेट एसोसिएशन के पदाधिकारी मन ह कलेक्टर डॉ सर्वेश्वर भुरे अउ एसएसपी प्रशांत अग्रवाल के संग बइठक करिस। ए बइठक म सुरक्षा के संग देखइया के सुविधा के बिसेस धियान रखत सबो तइयारी समय म पूरा करे म  अधिकारी मन बिसेस ज़ोर रिहिन। कलेक्टर ह क्रिकेट संघ के प्रतिनिधि मनला मैच के खातिर शहर म तको पर्याप्त संख्या म टिकिट काउंटर बनाये के सुझाव दीस। बइठक म छतीसगढ़ क्रिकेट एसोसिएशन के अध्यक्ष बलदेव सिंह भाटिया, ज़िला पंचायत के सीईओ आकाश छिकारा सहित कई अधिकारी तको मौजूद रिहिन।

बइठक म पहिली अंतरराष्ट्रीय क्रिकेट मैच के खातिर सबो ज़रूरी बेवस्था म गोठबात करे‍ गिस। स्टेडियम म उपलब्ध संसाधन अउ ज़िला प्रशासन ले अपेक्षित सहयोग म क्रिकेट एसोसिएशन के  अधिकारी मन ले बात करिस। स्टेडियम के साफ़ सफ़ाई, कुर्सियों के मरम्मत ले लेके वालंटियर्स अउ सुरक्षा उक म गोठबात करे गिस। मैच के बखत सबो एंट्री गेट म अग्निशमन अउ मेडिकल स्टाफ़ के संग एम्बुलेंस के बेवस्था रइही। स्टेडियम के फ़्लड लाइटस म तको हेलोजन बल्ब के जगह एलईडी लगे हावय।

मैच के बखत स्टेडियम परिसर के आसपास पार्किंग बेवस्था के खातिर ज़रूरी तइयारी म तको बइठक म बात होइस। पार्किंग जगह म पर्याप्त लाईट उक के संग सुरक्षा के इंतजाम, स्टेडियम परिसर म सफाई बेवस्था के खातिर पर्याप्त संख्या म सफाई संगवारी अउ आन जरूरी मशीन अउ उपकरण के व्यवस्था,पार्किंग जगह के समतलीकरण, आने-आने रद्दा ले आने वाला लोगन अउ स्टेडियम म देखइया के सुविधा के खातिर जगह-जगह साफ साईनेज उक लगाये म तको बइठक म गोठबात होइस।