अंजोर.रायपुर। महिला मन के घर के भीतर अउ बाहिर केऊ रकम ले के मुसीबत के सामना करना परत हावय। अइसे हर परिस्थिति म महिला मन के चौबीसों घंटा मदद करे के खातिर सरकार डहर ले बेवस्था सखी सेंटर अउ महिला हेल्पलाइन नंबर 181 के बेवस्था करे गे हावय। कोनो भी रकम ले घटना, प्रताड़ना या संकट होए म महिला मन तुरते मदद अउ आपातकालीन सेवा के खातिर हेल्पलाइन नंबर 181 म मोबाइल या लैंडलाईन ले कॉल करके मदद ले सकत हावय। ये नंबर चौबीसों घंटा काम करत हावय अउ ये फोकट म सेवा देत हावय। येकर संग पीड़ित महिला मन के मदद के खातिर छत्तीसगढ़ के जुन्ना सबो 27 जिला म सखी सेंटर संचालित हावयं। ये सेंटर मुसीबत म फंसे महिला मन के खातिर स्वास्थ्य, आश्रय, पुलिस, विधिक जइसे सबो रकम ले मदद एक ठऊर म ही उपलब्ध करात हावयं।
फोन करना संभव नइ हे त महिला मन वाट्सअप, फेसबुक, ट्विटर, ईमेल अउ वेबसाइट के माध्यम ले तको महिला मन हेल्पलाइन-181 ले मदद ले सकत हावयं। महिला हेल्पलाईन डहर ले तुरते मदद पहुचाये के खातिर राज्य म संचालित सखी वन स्टॉप सेंटर, पुलिस, हॉस्पिटल, सुधार गृह सहित आन आपातकालीन सेवा के संग समन्वय करके प्रकरण के निराकरण करे जाथे। सेंटर म प्रकरण दर्ज होए के बाद उंकर निराकरण तक फॉलोअप तको करे जाथे।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।