लोकछाया के संचालक दाऊ विजय चंद्राकर के निधन, महादेवघाट मुक्तिधाम म होही अंतिम संस्कार

अंजोर.रायपुर। छत्तीसगढ़ी लोक कला मंच ‘लोकछाया’ के संचालक दाऊ विजय चंद्राकर जी के 5 जनवरी के निधन होगे। उंकर जाए ले कला परिवार ल जबर क्षति होइस जेन कभु भरे नइ जा सके। संस्कृति कर्मी दाऊ विजय चंद्राकर प्रसिद्ध लोक गायिका छाया चंद्राकर के पति अउ पद्मश्री ममता चंद्राकर के देवर रहिन। दाऊ प्रेम चंद्राकर के छोटे भाई विजय चंद्राकर जी के परिवार ल कला विराजत म मिले हावय। तिसरइया पीढ़ी म बेटी पूर्वी अउ कशिश तको गजब नाम कमावत हाबे।

मिले आरो के मुताबिक दाऊ विजय चंद्राकर जी पाछु दिन ले ढेंगू बुखार के सेति एक निजी अस्प ताल म भरती रिहिस, अउ 5 जनवरी ओमन आंखरी सांस लिस। परिजन के बताती के उं‍कर अंतिम संस्कार महादेवघाट मुक्तिधाम रायपुर म मं‍झनिया 2 बजे करे जाही।

जानबा होवय के छत्तीसगढ़ी लोककला अउ संस्कृति ल जन-जन म बगराये म छत्तीसगढ़ के चंद्राकार परिवार के जबर योगदान हावय, उंकर कारज ल इतिहास सुरता रखही। सोनहा बिहान के संस्थापक दाऊ महासिंग चंद्राकार ले लेके पूर्वी अउ कशिश चंद्राकर तक तीन पीढ़ी ह कला ल संजोय राखे हावय। ये परिवार म प्रेम चंद्राकर, विजय चंद्राकर, ममता चंद्राकर, छाया चंद्राकर, पूर्वी चंद्राकर, कशिश चंद्राकर मन लोक कला के सेवा अउ साधना म रमें हावय। दाऊ विजय चंद्राकर के जाये परिवार म दुख के पहाड़ टूटगे अइसन बेरा भगवान उन मन ल दुख सहे के बल देवय अउ दिवंगत आत्मा ल अपन श्रीचरण ठउर देवे।