 |
| नोनी सुरक्षा योजना |
अंजोर.रायपुर। गरीब परिवार म जनम लेवइया बेटी मन के खातिर नोनी सुरक्षा योजना बड़ा सहारा बने हावय। येकर ले परिवार के बेटी मन के भविष्य के लेके चिंता दूरिहा होए हावय। योजना के तहत गरीब परिवार के बेटी मन के 18 साल पूरा होए अउ 12वीं पास होए म एक लाख रूपिया दे जात हावयं। येकर खातिर जिनगी बीमा निगम अउ महिला अउ बाल विकास विभाग के बीच अनुबंध करे गे हावय। नोनी सुरक्षा योजना के तहत राज्य सरकार डहर ले गरीब परिवार के पंजीकृत नोनी के नाम म भारतीय जिनगी बीमा निगम म 05 साल तक प्रति साल 5 हजार रूपिया माने कुल 25 हजार रूपिया जमा करे जात हावयं। योजना के तहत अब तक 76 हजार 477 लइका मन के पंजीयन करे गे हावय। साल 2021-22 म 11 हजार 765 बेटी मन के योजना के लाभ दे हावय।
जनगणना साल 2001 के आंकड़ा के मुताबिक छत्तीसगढ़ म बाल लिंगानुपात प्रति हजार 975 रिहिस जेन के जनगणना साल 2011 म घटकर एक हजार के अनुपात म 969 हो गे। ए रकम ले राज्य म घटते बाल लिंगानुपात अउ नोनी मन के प्रति समाज म सकारात्मक सोच बढ़ाये के खातिर 01 अप्रैल 2014 ले 'नोनी सुरक्षा योजना' लागू करे गिस। योजना के मुख्य उद्देश्य प्रदेस म नोनी मन के शैक्षणिक अउ स्वास्थ्य के स्थिति म सुधार लाना, नोनी मन के अच्छा भविष्य के आधारशिला रखना, नोनी भ्रूण हत्या रोकना अउ नोनी मन के जनम के प्रति समाज म सकारात्मक सोच लाना अउ बाल बिहाव ल रोकथाम करना हावय।
छत्तीसगढ़ राज्य के मूल निवासी अउ गरीबी रेखा के खल्हे जिनगी यापन करे वाला परिवार के 01 अप्रैल 2014 के बाद जन्मी अधिकतम दू नोनी मन के योजना के तहत लाभ मिलत हावय। योजना के सुरू होए ले शहरी क्षेत्र के गरीब परिवार के संग दूरस्थ आदिवासी क्षेत्र म बसे परिवार म तको बेटी मन के भविष्य के चिंता दूरिहा होए हावय। योजना के लाभ ले के खातिर जिला स्तर म जिला कार्यक्रम अधिकारी, जिला महिला अउ बाल विकास अधिकारी अउ विकासखण्ड स्तर म बाल विकास परियोजना अधिकारी ले संपर्क करे जा सकत हाबे।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।