 |
| आपसी झगड़ा म पत्नी ल मारिस टांगिया, हत्यारा पति गिरफ्तार |
अंजोर.रायगढ़। पुलिस चौकी रैरूमाखुर्द ले गांव बाकारूमा म रहइया नेहा सारथी (35 साल) के हत्या के आरोप म उंकर पति आरोपी सियाराम सारथी (46 साल) के चौकी प्रभारी रैरूमाखुर्द डहर ले हत्या के आरोप म गिरफ्तार करे गे हावय। पति-पत्नी के बीच 16 जनवरी के बिहनिया विवाद होए रिहिस। झगरा म सियाराम सारथी ह उंकर पत्नी नेहा सारथी ल टांगिया के पाछु हिस्सा ले मारके चोट पहुंचिस, दू दिन बाद ईलाज बखत नेहा सारथी अस्पताल म फौत होगे। मृतिका के परिजन के रिपोर्ट म कार्यवाही करत चौकी रैरूमाखुर्द, थाना धरमजयगढ़ म आरोपी सियाराम सारथी के विरूद्ध हत्या के अपराध दर्ज करके आरोपी ल हिरासत म लिस हावय।
जानकारी के मुताबिक सियाराम सारथी के मृतिका नेहा सारथी तीसरी पत्नी रिहिस। उंकर पहिली दू पत्नी के मउत के बाद सियाराम सारथी ह नेहा ल पत्नी बनाके रखे रिहिस। बिहनिया सियाराम सारथी चाउंर ले बर सोसाइटी बाकारूमा गे रिहिस। इही बीच नेहा सारथी कहूं ले दारू पीके आइस अउ पलंग के बगल म चटाई बिछाके सोये रिहिस। मंझनिया करीब सियाराम सारथी सोसायटी ले चाउंर लेके घर वापस आइस अउ उंकर पत्नी नेहा सारथी ल उठाके अउ दारू पीने के बात ल लेके झगड़ा मारत आंगन म लेके आये अउ आंगन म रखे टांगा के उठाके टांगा के पासा (पीछे के हिस्सा) कोति ले नेहा के पेट म दो-तीन बार मारके सियाराम वापस बस्ती, दुकान कोति चले गे।
सियाराम के घर मेहमानी म नेहा सारथी के भतीजी घर म मौजूद रिहिस। घटना के रतिहा चोट के सेती पीरा असहनीय होए ले नेहा सारथी चीखे चिल्लाये लगगे, जेला सियाराम सारथी ईलाज के खातिर गांव के प्राइवेट डाक्टर ल देखाइस। आन दिन सरकारी अस्पताल पत्थलगांव ले जाके भरती कराइन। जिहां प्रारंभिक उपचार के पाछु नेहा के रायगढ़ रिफर करे म सियाराम अउ घरवाले ह नेहा सारथी के राजप्रिय अस्पताल रायगढ़ ले जाके भरती करे रिहिस, जिहां बिहनिया नेहा सारथी फौत होगे।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।