मुख्यमंत्री भूपेश बघेल के पत्रकार मन के हित म बड़का फइसला, छत्तीसगढ़ मीडिया कर्मी सुरक्षा विधेयक-2023

अंजोर.रायपुर। मुख्यमंत्री भूपेश बघेल के अध्यक्षता म मंत्री परिषद के बइठक म पत्रकार मन के सुरक्षा के खातिर छत्तीसगढ़ मीडिया कर्मी सुरक्षा विधेयक- 2023  के प्रारूप के अनुमोदन करे गे हावय। ए विधेयक के अनुमोदन म पूरा प्रदेस के पत्रकार मन के कोति ले रायपुर प्रेस क्लब के अध्यक्ष  दामु आम्बेडारे ह मुख्यमंत्री के प्रति आभार व्यक्त करत किहिन हावय के मुख्यमंत्री ह संवेदनशीलता के संग विचार करके मीडिया करमी के भावना के सम्मान करत सुरक्षा कानून लागू करे के दिशा म जरूरी कदम उठाये हावय। येकर ले मीडिया के संगी जादा उत्साह के संग जनहित म अपन कर्तव्य निभा सकही।

श्री दामु आम्बेडारे ह किहिन के मुख्यमंत्री बघेल ह पत्रकार मन के सुरक्षा के खातिर कानून बनाये बर कमेटी बनाईस। सुरक्षा विधेयक के मसौदा तइयार कराइन अउ अब कैबिनेट के बइठक म प्राथमिकता के संग ओकर अनुमोदन करके छत्तीसगढ़ के मीडिया करमी के साल जुन्ना मांग पूरा कर दीस हावय।

ओमन किहिन के मुख्यमंत्री भूपेश बघेल पत्रकार कल्याण के हर मांग म गजब संवेदनशील हावयं। ओमन पत्रकार के हित म अधिमान्यता के दायरा बढ़ाये के संग ही, नियम म सरलता लान के मीडिया करमी के प्रति सदाशयता देखाइस हावय। मुख्यमंत्री ह पत्रकार सम्मान निधि 5 हजार ले बढ़ाके 10 हजार रूपिया हरेक महीना करे हावय। येकर संग ही बजट म पत्रकार गृह बनाये अनुदान योजना के सुरू करे  जाये के प्रावधान करिन हावय जेकर खातिर 50 लाख रूपिया के प्रावधान करे गे हावय।