कुदरगढ़ म बघवा के हमला, घायल ल बढि़या इलाज के निर्देश, कुदरगढ़ महोत्सव के संस्कृतिक कार्यक्रम स्थगित

अंजोर.सूरजपुर। सूरजपुर के विकासखंड ओड़गी के गांव कालामंजन म बाघ ह तीन गांव वाला म हमला कर दे रिहिस। घायल के प्राथमिक इलाज देत सामुदायिक स्वास्थ्य केंद्र ओड़गी ले जिला अस्पताल सूरजपुर रिफर कर दे गिस। सामुदायिक स्वास्थ्य केंद्र ओड़गी म एक मनखे समय लाल के मउत हो गे। दू घायल के जिला अस्पताल सूरजपुर म भरती करके इलाज करे जात हावय घायल मरीज मनला देखे के खातिर  कलेक्टर सुश्री इफ्फत आरा जिला अस्पताल पहुंचिस अउ घायल के बढि़या स्वास्थ सुविधा दे बर स्वास्थ्य अमला के निर्देशित करिन। कलेक्टर ह कैलाश पिता बालसाय स्थिति सामान्य  नइ होए के स्थिति ल देखत ओला अम्बिकापुर मेडिकल कॉलेज रेफर करे के निर्देश दिस। जिहां उंकर तको इलाज के बखत मउत हो गे। कलेक्टर ह मुख्य चिकित्सा अउ स्वास्थ्य अधिकारी डॉ. आरएस सिंह, सिविल सर्जन अस्पताल अधीक्षक डॉक्टर आरके त्रिपाठी के घायल के बढि़या चिकित्सा सुविधा दे बर निर्देशित करिन।

ओड़गी वन परिक्षेत्र कालामंजन जंगल म बाघ ह तीन गांव वाला म जानलेवा हमला कर दीस, जहा एक ग्रामीण के अस्पताल म मउका म मउत हो गे। उहे दू घायल के जिला अस्पताल म ईलाज जारी हावय। तीनो ग्रामीण जंगल म जलावन लकड़ी ले गे होइस रिहिस। जानबा होवय के ओड़गी ब्लॉक के जुन्ना कुदरगढ़ देवी धाम म कुदरगढ़ महोत्सव अउ मेला के अयोजन करे गे हावय।  कलेक्टर इफ्फत आरा ह घायलो ले मुलाकात करके डॉक्टर मन ले गोठबात करे । ओमन पुलिस विभाग, वन विभाग अउ राजस्व के मैदानी अमलो के लोगन के सुरक्षा के देखत बिसेस दिशा निर्देश दे हावय। उहे करिया मांजन इलाका के सुरक्षा के देखत पुलिस अउ वन अमला के डहर ले घेराबंदी करे गे हावय, जहा वाइल्ड लाइफ के टीम मउका म पहुंचे के बाद बाघ के रेस्क्यु करके जंगल के अंदरूनी इलाका म पहुंचाये जाही।

मउका के गंभीरता के देखत कुदरगढ़ महोत्सव के 27 मार्च के आयोजित होए वाला संध्याकालीन संस्कृतिक कार्यक्रम ओड़गी क्षेत्र के गांव कालामंजन म बाघ के मौजूदगी होए के सेती मनांहि करके दे हावय, अउ सबो के सूचित करे गे हावय के क्षेत्र म स्वयं सावधान रिहिनं अउ आन के तको सावधान रेहे आरो कराये हाबे।